НАР ХИРТЭЛТИЙГ ТРАМП ЦАГААН ОРДОНЫ БАЛКОН ДЭЭРЭЭСЭЭ СОНИРХОВ

АНУ-ын нутаг дэвсгэрт өчигдөр дорноос өрнө цэг хүртэл нийт 14 мужийг хамарсан нар хиртэлт боллоо. Энэхүү байгалийн онц содон үйл явдлыг "Америкийн агуу нар хиртэлт" хэмээн хэвлэлүүд нэрийдсэн байна. АНУ-ын нутаг дэвсгэрийн дорноос өрнө цэг хүртэл нар хиртсэн тохиолдол 99 жилийн өмнө л болж байжээ.

АНУ-ын Ерөнхийлөгч Дональд Трамп нар хиртэлтийг Цагаан ордоныхоо хоёр давхрын балконоос эхнэр Мелани Трампынхаа хамт харсан байна. Харин Трампын охин Иванка Трамп нар хиртэлтийг харахдаа тусгай хамгаалалтын нүдний шил зүүхийг олон нийтийн сүлжээгээр идэвхтэй сануулж байлаа.

Улаанбаатарын цагаар наймдугаар сарын 22-ний шөнийн 00:48-аас 04:01 минут хүртэл Орегон, Айдахо, Монтана, Вайоминг, Небраска, Канзас, Айова, Миссури, Иллинойс, Кентукки, Теннесси, Хойд Каролина, Жоржиа, Өмнөд Каролина гэсэн АНУ-ын 14 мужаас нар хиртэлтийг харах боломжтой байснаас нарны бүтэн хиртэж, асч буй бөгж шиг болох агшинг АНУ-ын зургаан хот /Сейлем, Линкольн, Канзас-Сити, Нешвилл, Колумбиа/-д бүрэн харах боломжтой байсан гэнэ. Нарны хиртэлтийн хугацааг 1.08-2.40 минут гэж тогтоосон байна.

NASA-гаас муж, хот дахь нар хиртэлтийг харуулахаар тусгай баг ажиллуулж, асар өндөр зарлага гаргажээ. Олон сая хүн нар хиртэлтийг харахаар NASA TV-ийн цахим хуудас руу хандсан тул эхэндээ гацахад хүрсэн юм.

М.Болджин