Саудын Арабд Исламын шашны хатуу дэг жаягтай. Тэр хатуу дэг жаягийнх нь хязгаарлалт эмэгтэйчүүдийн эрхийг олон байдлаар хумьж байдгийг дэлхий нийт мэднэ. Тэгвэл тус улсын хаан Салманы гаргасан зарлиг олон улсын анхаарлыг татаад байна. Юу гэхээр эмэгтэйчүүдэд машин жолоодох зөвшөөрлийг тэрбээр албан ёсоор олголоо.
Тус улсад эмэгтэйчүүдийн нийгэмд оролцох оролцоо бусад улс орнуудынхаас хамгийн доод түвшинд байдаг. Тэрчлэн хаан нь ийм зарлиг гаргах хүртэл бую өчигдрийг болтол Саудын Араб улс эмэгтэйчүүдийг автомашин жолоодохыг хориглодог дэлхийн ганц орон байв.
Салман хааны зарлигтаа замын хөдөлгөөний хуулинд шаардлагатай өөрчлөлт оруулахыг сайдад үүрэг болгож буйгаа өгүүлжээ. Гэхдээ хааны зарлиг 2018 оны зургаадугаар сараас хөрсөн дээр бууж хэрэгжих юм байна.
Дашрамд өгүүлэхэд, Саудын Арабын орон нутгийн засаг захиргаанд 2015 онд анх удаа эмэгтэйчүүд суудал авч байсан юм. Тус улсын эрх баригчид орон нутгийн сонгуульд анх удаа эмэгтэйчүүдэд санал өгөх, нэр дэвших эрх олгосон нь тэр юм.
М.Болджин
Сэтгэгдэл (0)
Сэтгэгдэл бичигдээгүй байна