Жил ирэх тусам нийслэл хот өнгө засч, өнгө үзэмж нь сэргэж байна. Гэвч хотод амьдарч байгаа иргэдийн хувьд хотын соёлтой хөл нийлүүлэн алхаж чадахгүй байна гэх шүүмжлэл бий. Их хотын соёл жижиг зүйлээс эхэлдэг. Татсан тамхиныхаа ишийг хогийн саванд хийчихдэг сэтгэл иргэдэд дутагдаж байгааг ТҮК-ийн ажилтан хэлж байгаа юм. Сүүлийн жилүүдэд нийслэлийн удирдлагуудын зүгээс хогийн савны асуудлыг нэлээд сайн шийдэж өгсөн. Тав алхаад хогийн сав хаа сайгүй байдаг. Гэвч иргэдэд татсан тамхины ишээ хогийн саванд хийчих ухамсар дутаж байна.
.Францад тамхичдыг гудамжинд хаясан тамхины иш бүрийнх нь төлөө 35 еврогоор торгодог. Гэтэл манай улсад ТҮК-ийнхэн цэвэрлэх ёстой гэсэн иргэдийн ухамсар давамгайлсаар байгаа нь нууц биш. Жил ирэх тусам иргэд барьж яваа хогоо хаа таарсан газраа хаях нь багасч, хогийн саванд хог, хаягдлаа хийх ухамсар бий болж байгаа ч татсан тамхиныхаа ишийг хаа сайгүй хаядаг байдал багасахгүй байгааг ТҮК-ийнхэн хэлж байгаа юм аа.
Замын хажуу, байгууллагуудын ойр орчимд татсан тамхины иш хөглөрөх нь энгийн үзэгдэл мэт болчихоод байна. Улаанбаатар хотын хогийн дийлэнх хэсэг нь тамхины иш байгаа гэдэгтэй хэн ч маргахгүй биз. Тамхины эсрэг хууль хэрэгжихээс өмнө гудамжаар алхахад хэн нэгний татсан тамхины утаагаар амьсгалж, тамхины үнэр авч чадахгүй нэг нь амьсгаагаа түгжих шахам алхаж явдаг олон хүн байсан. Харин уг хууль хэрэгжсэнээр олон нийтийн газарт тамхи татаж, бусаддаа хүндрэл учруулдаг бүдүүлэг байдал үгүй болж, Хотын иргэдэд мэдэгдэхүйц ухамсарыг суусан. Гэвч тав алхаад хогийн сав байхад татсан тамхиныхаа ишийг аваачаад хийчих сэтгэлгээ л иргэдийн ухамсарт сууж өгөхгүй байна.
Сэтгэгдэл (0)
Сэтгэгдэл бичигдээгүй байна