Хятадын Гаунжоу мужид 29 настай залуу гар утасны тоглоомонд донтож, хоёр өдөр тасралтгүй тоглосны дараа гурав дахь өдрийнхөө өглөө дөрвөн мөч нь татаж, ухаан алдаж унажээ. Ингээд гэрийнхэн нь түргэн тусламжийн төвд яаралтай хүргэж, MRI шинжилгээ хийж үзэхэд нурууны мэдрэлийн судсууд дарагдаж, цус хуралт үүссэнийг тогтоосон байна. Эмч нар түүнд яаралтай хагалгаа хийсний үр дүнд дөрвөн мөч нь сэргэж, алхдаг болсон ч зуун хувь хэвэндээ ортол удаан хугацаанд физик эмчилгээ хийлгэх шаардлагатай болжээ.
Тэрээр хүзүү нь хөшиж, хөндүүрлэхийг ч үл хайхран тоглосон байв. Эмч нарын хэлж буйгаар Хятадад гар утсыг хэт удаан хугацаагаар хэрэглэсний улмаас бөгтөр нуруутай,үе мөчний өвчтэй болох нь ихэсчээ. Ялангуяа, залуучууд ийм өвчинд нэрвэгдэж байгаа нь харамсалтай явдал юм. Тиймээс Хятадын Засгийн газар залуучуудын эрүүл мэндэд онцгойлон анхаарч, утасны тоглоомыг хязгаарлах арга хэмжээ авч эхэллээ.
Гар утсанд донтох нь тархинд цус харвах, хүзүү шохойжих, нүдний даралт ихсэх, харааны бэрхшээлтэй болох, нойргүйдэх зэрэг олон сөрөг үр дагавартайг мэргэжилтнүүд анхааруулж байна. Мөн гар утсыг нэг дор 30 минутаас дээш хугацаагаар үзэхгүй байх, зохиомол гэрлээс хөндийрч, байгалийн гэрэлтэй орчинд ихэнх цагийг өнгөрөөж, нүдээ хамгаалахыг зөвлөжээ.
Сэтгэгдэл (0)
Сэтгэгдэл бичигдээгүй байна