Өчигдөр Нанжины халдлагын 80 жилийн ой болж, "Хөөрхий эмэгтэйчүүд булшиндаа нууцаа хадгалан үлдлээ" гэсэн гарчигтай нийтлэл Хятадын хэвлэлд цацагджээ. Нанжины хядлага гэж нэрлэгдсэн Японы армийн хүчирхийлэл дэлхийн хоёрдугаар дайны үед буюу 1937 оны 12-р сарын 13-наас эхэлсэн юм. Тухайн үеийн Хятадын нийслэл Нанжины иргэдийг эмэгтэйчүүд, хүүхэд гэж ялгалгүй үй олноор нь хядсан энэ хэрэг түүхэнд хар толбо болон үлдэж өнөөг хүртэл улс төрийн маргаан дагуулсаар байна.
300 мянган хүний амийг авч одсон аллага Нанжин хотыг хар дарсан зүүд мэт болгожээ. Японы цэргүүд архи уун согтож, гудамжаар сэлгүүцэж охид, бүсгүйчүүдийг хүчирхийлж, дээрэм тонуул хийн, хүмүүсийг шатааж хөнөөн дураараа дургиж байв. Японы эзэрхийллийн эхний дөрвөн өдрийн дотор хорин мянган эмэгтэй хүчиндүүлж дийлэнхийг нь зэрэмдэглэн хөнөөжээ.
Дэлхийн хоёрдугаар дайны үед Япончууд секс боолчлолын зорилгоор 200 мянган хятад эмэгтэйг хүчирхийлж байсан гэж түүхчид үздэг. Нанжинд нэг эмэгтэй 10 өдрийн дотор 71-267 цэрэгт хүчирхийлүүлж байжээ.
Эмэгтэйчүүдийг төдийгүй, бага насны охидыг хүчирхийлээд дараа нь зэрлэгээр хөнөөж байжээ. Хохирогчдын цус урсаж, гол мөрөн тэр чигтээ улаан өнгөтэй болсон талаар баримтад дурдсан байдаг.
Одоо хүчирхийрлийн хохирогч эмэгтэйчүүдээс 15 хүн л амьд сэрүүн байдаг ажээ. Тэдний нэг болох 89 настай Хэ Юлиан өөрийн гашуун түүхээ хуваалцсан байна. Тэрээр "Намайг 15 настай байхад тосгонд Япон цэргүүд довтолж, эрчүүдийг хөнөөж эхэлсэн. Тэр үед намайг хоёр цэрэг хүчиндэж цус алдаж байхад хэн ч тусалж чадаагүй. Дараа нь надаас гадна зургаан охиныг цэргүүдэд биеэ үнэлдэг газар хүчээр аваачсан" хэмээн ярьжээ.
Япон цэргүүд Хятад эмэгтэйчүүдийг хэрцгийгээр тамлан зовоож байсан тухай баримтууд цөөнгүй бий. Тухайлбал, Японы сар тутмын сонинд нэгэн япон цэрэг согтуу байхдаа Хятад эмэгтэйг хэрцгийгээр хүчиндсэн талаар нийтэлж байсан нь архивт хадгалагдаж үлджээ. 1945 оны наймдугаар сард Япончууд бичиг баримтуудыг устгасан боловч 1950 онд Хятадын Жилин мужийн үйлдвэрээс зарим баримтууд олдож байв.
Тухайн үед Япончууд хэрхэн харгис авирлаж байсныг хохирогчдын ярианд үндэслэн зургаар илэрхийлснийг хүргэе.
1.Жин Маожигийн аав япон цэргүүдтэй тулалдаж байгаад баруун гараа тасдуулж амиа алджээ.
2.Хүмүүсийг хүүхэд, хөгшин гэж ялгалгүй хөнөөж байна.
3.Япон цэргүүд ахыг нь хутгалсны дараа ээж, дүү хоёр нь "Амь авраач" хэмээн өвдөг сөхрөн гуйж байна.
4.Ли Ланин гэдэг энэ настан Япон оффицер жаахан охины шүдийг цөм цохиж, хутгалан хөнөөж байсныг гэрчлэв.
5.Хохирогчдын дундаас аавынхаа цогцсыг олов.
6.Ээж, ах хоёроо үүрд алдсанаа мэдэв.
Сэтгэгдэл (0)
Сэтгэгдэл бичигдээгүй байна