Монголбанк энэ сарын 11-ний байдлаар 682 кг алт худалдан авлаа. Уг үзүүлэлт нь өнгөрсөн оны мөн үеийнхээс 130 хувиар өссөн дүнтэй байгаа бөгөөд тухайн үед худалдан авсан алтны дүн 297 кг байв. Энэ оны эхний 11 хоногийн байдлаар Лондоны үнэт металлын захын алтны ханш өндөр үнэтэй байв. Үүнээс шалтгаалан 1 грамм алт худалдан авах Монголбанкны үнэ 102-103 мянган төгрөгтэй тэнцэж, алт тушаалтын хэмжээ өсөх хандлагатай байна. Монголбанк өнгөрсөн онд 20 тонн алт худалдан авсан. Энэ нь 2016 онд 18.3 тонн алт худалдан авснаас 1.5 тонн илүү буюу 8 хувиар өссөн үр дүн юм. Аливаа улс орон гадаад валютын нөөцөө нэмэгдүүлэхийн тулд Төв банкиндаа алт нөөцөлдөг жишигтэй. Гэвч манай улсын алтны нөөц 2000 онд 2.1 тонн хүрч, гадаад валютын албан нөөц огцом буурч байсан түүх бий. Энэ хүрээнд Засгийн газраас эдийн засгийг сэргээж, алтны олборлолт, нөөцийг нэмэгдүүлэх зорилгоор энэ онд "Алт-2" хөтөлбөрийг хэрэгжүүлсэн. Өмнө нь "Алт хөтөлбөр" болон "Алт-2000 хөтөлбөр"-ийг 1992-2000 онд хэрэгжүүлж байсан билээ. Уг хөтөлбөрийг хэрэгжүүлснээр ашигт малтмалын нөөц ашигласны төлбөр хэлбэрээр жилд дунджаар 33-59 тэрбум төгрөгийг улсын төсөвт төвлөрүүлж, гадаад валютын албан нөөцийг зузаатган, алтны бэлтгэгдсэн нөөцийг 100-150 тонноор нэмэх боломжтой хэмээн тооцолсон юм.
Эх сурвалж:Newspress.mn
Сэтгэгдэл (0)
Сэтгэгдэл бичигдээгүй байна