Каннын кино наадмын гол шагнал болох "Алтан дал мод" шагналыг хаана үйлдвэрлэдэг бол гэж та бодож байсан уу? Женевийн Майсон Чопард гэх газар уг шагналын цомыг 20жилийн өмнөөс үйлдвэрлэж байгаа юм. Тус компанийг хамтран эзэмшигчдийн нэг Каролин Шойфеле "Энэ бол хайрын түүх юм. Алтан дал мод кино наадамтай хамтран ажилласнаар бид гоёл чимэглэлийн салбараа өргөжүүлж чадсан. Энэ үйлдвэртээ бид 37 гаруй нэр төрлийн гар урлалын зүйлсийг бүтээж байна. тэдгээрээс дурьдвал өнгөлөх, загварыг нь гаргах, цаг хийх болоод алтан эдлэл гээд маш олон төрлийн зүйлсийг бид урладаг" гэж хэлсэн байна. Нэг ширхэг "Дал мод"-ыг үйлдвэрлэхэд алтны дархан, гоёл чимэглэл урлаач нийлсэн 7хүн 7хоногт 40цаг ажиллах шаардлагатай болдог байна. Цомыг бүхэлд нь гар аргаар урладаг бөгөөд лааны тосыг хэвийг нь гаргадаг байна. Эхлээд хайлуулсан лааны тосоо хэвэнд цутгаж хөргөөсний дараа дал модон хэлбэртэй болсон лааны тосоо салгаж авна. Салгаж авсан дал модыг суурин дээр тогтоосны дараа цементний зуурмагаар шүршин халуун орчинд хатаагаад 760хэмийн халуун зууханд шатаадаг байна. Шатаалтын үеэр лаа хайлж үгүй болохоос гадна дал модны дотор тал нь хөндий болдог. Дараа нь хөргөөх камерт хөргөөгөөд, Колумбиас авдаг 18 каратын 118гр шар алтыг хайлуулан цементэн хэвэндээ хийгээд хүйтэн усанд хийж хөргөөдөх цементэн хэсэг нь салж "Алтан дал мод" гарч ирдэг байна. Ингээд дал модоо цэвэрлэж, өнгөлөх үеэрээ жижиг алдаа байгаа эсэхийг сайтар шалгадаг. Ингээд өөгүй болсон цомоо болор суурин дээр тогтоодог байна. Каролин Шойфеле Дал модны 20жилийн ой тохиож байгаатой холбоотойгоор энэ жилийн дал модон дээр 0,70каратын очир эрдэнийг байрлуулна гэсэн нууцыг задалсан байна. Энэхүү онцгой "Алтан дал мод" шагналын эзэн хэн болохыг 5-р сарын дундуур болох Каннын кино наадмаас харж болох юм.
Сэтгэгдэл (0)
Сэтгэгдэл бичигдээгүй байна