"2018 оны эхний хоёр сарын байдлаар нийслэлийн хэмжээнд 2243 хулгайлах гэмт хэрэг үйлдэгдсэн. Ихэвчлэн автомашины эд анги, түүн дотроо аккумлятор хулгайлах, приус автомашины зөөлөн яндан хулгайлах гэмт хэргүүд ихэвчлэн үйлдэгдэж байна. Хулгайн гэмт хэрэгтэй тэмцэх чиглэлээр Нийслэлийн цагдаагийн газрын Мөрдөн шалгах газраас дүүргүүд дахь цагдаагийн хэлтсүүд, олон нийтийн аюулгүй байдлыг хамгаалах албатай хамтраад эргүүл, хяналт шалгалтын ажиллагаа явуулж эхэлсэн.
Нийслэлийн цагдаагийн газраас 150 гаруй аккумляторыг тээврийн хэрэгсэл ашиглаж хулгайлсан бүлэг этгээдийг олж тогтоогоод баримтжуулан шалгаж байна. Эдгээр этгээд 17-22 насны зургаан этгээд байгаа. Тэд хоёр машин ашиглаад Баянзүрх, Баянгол, Сонгинохайрхан дүүргийн нутаг дэвсгэрээс дээрх аккумляторуудыг хулгайлсан нь тогтоогдсон. Тэд дандаа том оврын автомашины аккумлятор хулгайлсан. Улмаар хулгайлсан аккумлятороо хоёрдогч түүхий эд авдаг зургаан цэгт байнга зарж борлуулдаг байсан байна.
Эрүүгийн хуулийн 18.6-д мөнгөн угаах гэсэн зүйл анги бий. Тиймээс хоёрдогч түүхий эд авдаг цэгүүдэд гэмт хэргийн замаар олсон эд зүйлс гэдгийг мэдсээр байж авсан гэсэн зүйл ангиар эрүүгийн хэрэг үүсгэн шалгана.
Аккумлятороо алдсан иргэдийн зарим нь цагдаагийн байгууллагад хандаагүйгээс хохирогч тогтоогдохгүй байгаа. Ийм дээрх дүүргийн нутаг дэвсгэрээс аккумлятороо алдсан иргэд байвал Нийслэлийн цагдаагийн газрын мөрдөн шалгах хэлтсийн Хулгайлах гэмт хэрэгтэй тэмцэх хэлтэстэй хамтран ажиллаж, хандах шаардлагатай байна" гэлээ.
Сэтгэгдэл (0)
Сэтгэгдэл бичигдээгүй байна