МҮБХ Олон жилийн турш хэл амтай, хэрүүл тэмцэлтэй явж ирсэн удирдлагуудын асуудал өдгөө бөхчүүдийг хооронд нь талцуулж байна. Уг холбооны маргаан эцэслэгдсэн гэж байгаа ч шүүхийн шийдвэрийг биелүүлэхгүй асуудлыг хурцдуулсан Р.Нямдорж, Дархан аварга Б.Бат-Эрдэнэ нарт асуудал байна гэх ч эдний зүгээс Бөхийн холбоог хууль бусаар, хуурамч тамга тэмдгээр "Гацуурт"-ын Л.Чинбат тэргүүтэй нөхдүүд авах гэж улайрч байна гэж шүүмжилдэг. Гэвч бодит байдал дээрээ хэн нь албан ёсоор ОӨУБЕГ-т бүртгүүлсэн байгаа нь эргэлзээтэй. Уг нь тус газраас л хууль ёсны бүртгэлтэй нь хэн бэ гэдгийг олон нийтэд зарлачихвал маргааныг эцэслэх ч одоог хүртэл ийм арга хэмжээ аваагүй л байна. Өнгөрсөн амралтын өдрүүдэд болсон үймээн самууны үеэр Дархан аварга Б.Бат-Эрдэнийн бие хамгаалагч Б.Одхүү УИХ-ын гишүүний халдашгүй дархан байдалд нь халдаж, А.Сүхбатын биед хүнд гэмтэл учруулжээ. Энэхүү хэргийг Баянзүрх дүүргийн хоёрдугаар хэлтэст шалгаж байгаа бөгөөд гишүүний хувьд гэмтлийн зэргээ тогтоолгохоор шүүх шинжилгээний газарт хандсан байгаа аж. Түүнийг Бөхийн өргөө дотор сууж байхад нь Б.Одхүү 10 гаруй залуугийн хамт Бөхийн өргөө рүү дайрч ороод зодсон гэх. Хууль дүрэм үйлчилдэггүй хүнийг хувийн бие хамгаалагчаараа авч бусдынхаа эсрэг турхирч эхэлсэн Б.Бат-Эрдэнэ аваргыг ч буруутгаж эхлэв. Бөхчүүд бөхчүүдээ хооронд нь алалцуулан байж, Бөхийн өргөөний тэргүүнээр суух гэж байгаа Дархан аваргад ямар далд санаа, эрх ашиг нуугдаж байна вэ гэж нийгэм бүхэлдээ хардаж эхэллээ. Үнэндээ Б.Бат-Эрдэнэ нь хууль ёсны тэргүүн үү, Л.Чинбат нь хууль ёсных уу гэдгийг цаг хугацаа харуулах ч энэ эцэс төгсгөлгүй тэмцэл цаашид хэрхэн яаж үргэлжлэх бол гэдгээс ард түмэн айж эмээж байна.
Сэтгэгдэл (0)
Сэтгэгдэл бичигдээгүй байна