Нийслэлийн 19-р сургуулийн сурагчдыг 42-р сургуульд түр шилжүүлэн суралцуулахаар болжээ. Тодруулбал, энэ жил Баянгол дүүргийн хэмжээнд 19-р сургууль болон гурван цэцэрлэгийг буулгаж шинээр барих ажил өрнөнө. Энэ хүрээнд ашиглалтын шаардлага хангахгүй байгаа тус сургуулийн барилгыг буулгаж шинээр барихын тулд тус сургуулийн 500 орчим хүүхдийг 42-р дугаар сургуульд түр шилжүүлэн суралцуулах аж.Нийслэлийн Засаг даргын Нийгмийн хөгжлийн асуудал хариуцсан орлогч Ш.Анхмаа, Нийслэлийн Засаг даргын Тамгын газрын Нийгмийн бодлогын хэлтсийн дарга М.Эрдэнэжаргал, нийслэлийн Боловсролын газрын орлогч дарга Л.Дашдэмбэрэл нар сурагчдыг түр шилжүүлэн суралцуулах асуудлаар 42-р сургуулийн захиралтай уулзаж, үйл ажиллагаатай нь танилцсан байна. Энэ үеэр Нийслэлийн Засаг даргын Нийгмийн хөгжлийн асуудал хариуцсан орлогч Ш.Анхмаа "Улсын төсөвт 2018 онд нийт 34 сургуулийг шинээр барих буюу өргөтгөх ажлыг тусгасан. Энэ ажил 2018-2019 он дамжин хэрэгжих юм. Ашиглалтын шаардлага хангахгүй сургуулийн барилгыг буулгаж шинээр барих ажил төслийн хүрээнд хийгдэнэ. Тус ажлыг эхлүүлэхийн өмнө суралцагчдыг хэрхэн хоцрогдолгүйгээр үргэлжлүүлэн сургах вэ гэсэн асуудал бидний өмнө тулгардаг. Энэ хүрээнд сурагчдыг өөр сургуульд шилжүүлэн суралцуулж байна" гэлээ.
Сэтгэгдэл (0)
Сэтгэгдэл бичигдээгүй байна