Бүгд найрамдах Турк улс (БНТУ)-ын Хяналтын шатны шүүхийн Ерөнхий прокурорын орлогч Халил Адикизел, Хууль зүйн академийн дэд ерөнхийлөгч Рифат Инанк тэргүүтэй төлөөлөгчдийг Монгол Улсын Шүүхийн ерөнхий зөвлөлийн дарга Н.Лүндэндорж, гишүүн Д.Эрдэнэчулуун, Гүйцэтгэх нарийн бичгийн дарга Т.Мэндсайхан нар өнөөдөр (2018.05.11) хүлээн авч уулзлаа.
Шүүхийн ерөнхий зөвлөлийн дарга Н.Лүндэндорж зочдод Монгол Улсын шүүх, Шүүхийн ерөнхий зөвлөлийн бүтэц, чиг үүргийг танилцуулаад хоёр талын хамтын ажиллагаа эрчимтэй үргэлжилж байгаад талархал илэрхийллээ. Хяналтын шатны шүүхийн Ерөнхий прокурорын орлогч Халил Адикизел хариу талархал илэрхийлээд хоёр улсын улс төр, хууль зүйн салбарын хамтын ажиллагаа хурдтай хөгжиж байгааг онцолсон юм. Тэрбээр "Манай хоёр улс орон зайн хувьд хол ч зүрх сэтгэлээрээ ойр ард түмэн. Улс төр, хууль зүйн салбарын төлөөлөгчид хоёр улсад цөөнгүй удаа харилцан айлчилж, хамтын ажиллагаагаа эрчимжүүлж байгаа нь үүний илэрхийлэл" гэв.
БНТУ-ын Хууль зүйн академийн дэд ерөнхийлөгч Рифат Инанк "Хууль зүйн академи олон улсад нэр хүнтэй сургууль. Бид найрсаг харилцаатай, ах дүү орон руугаа чиглэсэн сургалт явуулахыг зорьдог. Хамтран ажилладаг тэдгээр улсуудын тэргүүнд Монгол Улс байдаг. Монгол Улсын шүүгчдэд зориулсан сургалт ирэх намраас үргэлжлэх боломжтой болсныг дуулгахад таатай байна. Бид Монгол Улсын шүүгчдэд хүссэн үед нь боломжоороо сургалт явуулна. Манай сургуулийг Монгол Улсын Хууль зүйн академи гэж ойлгож болох хэмжээнд хамтран ажиллана" гэлээ.
Шүүхийн хүний нөөцийн газрын дарга Ш.Отгонцэцэг, Шүүхийн судалгаа, мэдээлэл, сургалтын хүрээлэнгийн захирал Ц.Мандах, Шүүхийн гадаад харилцааны хэлтсийн даргын АҮТОГ Г.Билгүүн нар уулзалтад байлцав.
Уулзалтын дараа зочид Захиргааны хэргийн давж заалдах шатны шүүхэд зочилж, шүүх хуралдааны "Green hall" танхимтай танилцсан юм.
БНТУ-ын шүүх, прокурорын байгууллага, Хууль зүйн академийн төлөөлөгчдийн Монгол Улсад хийж буй албан айлчлал 2018.05.15-ны өдөр хүртэл үргэлжилнэ хэмээн Шүүхийн хэвлэл мэдээлэл, олон нийттэй харилцах хэлтсээс мэдээллээ.
Сэтгэгдэл (0)
Сэтгэгдэл бичигдээгүй байна