УИХ-ын Төрийн байгуулалтын байнгын хорооны хуралдаанаар Үндсэн хуульд нэмэлт, өөрчлөлт оруулах ажлын хэсгийн ажлын явцын талаарх мэдээллийг сонслоо. Түүний дараа гишүүд асуулт тавьж, хариулт авав.
УИХ-ын гишүүн Д.Эрдэнэбат "Үндсэн хуулиндаа баялгийн сангийн талаар, шүүхийн шударга тогтолцооны талаар, УИХ-ын талаар ямар зүйл туссан бэ" хэмээн асуув. Ажлын хэсгийн ахлагч Д.Лүндээжанцан "Ерөнхий сайдад кабинетаа өөрөө бүрдүүлэх эрх өгч байгаа. Харин Ерөнхий сайдыг огцруулах асуудлыг оруулахдаа шинэ Ерөнхий сайдыг давхар оруулж ирж гурав хоногийн дотор дэмжинэ. Мөн Засгийн газрыг огцруулах саналыг нийт гишүүдийн 4/1-ийн саналаар оруулж ирж, 15 хоногийн дотор шийднэ гэж байгаа.
УИХ өөрийнхөө төсөв, томилгооны эрхээс татгалзаж, чуулган, байнгын хорооны хуралдаанд итгэл үнэмшлээрээ оролцож саналаа өгнө гэж оруулсан. Ингэснээр бусдын кноп дарахгүй байна. Хуулийг гишүүдийн олонхийн саналаар батална. УИХ-ын гишүүн "давхар дээл"-тэй болохыг хуулиар хязгаарлаж өгч байна" хэмээн хариуллаа.
Ажлын хэсгээс "Орон нутгийн улс төржилтийн тухай асуудал хэлэлцүүлгийн явцад байнга хөндөгдөж байсан. Орон нутгийн түвшинд улс төржилтийг зогсоохын тулд ИТХ-ыг сонгоход улс төрийн нам оролцохгүй байх, иргэд өөрсдөө нэр дэвшүүлэх заалт орж байгаа. Мөн тухайн сум, дүүргийн Засаг даргыг тухайн сум дүүргийн иргэдээс сонгоно" гэсэн заалт оруулж байна. Харин аймаг, нийслэлийн Засаг дарга нарыг хуулиараа тогтоогоод явах нь зөв байх" гэв.
Сэтгэгдэл (0)
Сэтгэгдэл бичигдээгүй байна