Уул уурхайн хүнд үйлдвэрт хүчин зүтгэж буй 1288 иргэн, тэдний гэр бүлийн ажил амьдралыг залгуулж буй Монголросцветмет компаний 45 жилийн нөр их хөдөлмөрийг үнэлж хөдөлмөрийн гавьяаны улаан тугийн одонгоор шагнасан нь саяхан. Харин өнөөдөр тэрхүү түүхийг хамт бичилцсэн үе үеийн албан хаагчид төрийн дээд одонгоор шагнагдлаа.
"Монголросцветмет" ХХК нь БНМАУ болон ЗСБНХУ-ын Засгийн газар хоорондын 1973 оны 02 дугаар сарын 24-ний өдрийн хэлэлцээрийн үр дүнд БНМАУ-ын нутаг дэвсгэр дээр хайлуур жоншны хүдэр, алт олборлох үндсэн үйл ажиллагааны чиглэлээр байгуулагдаж, жилд 1.0 сая шоо метр элс угаах хүчин чадалтай Толгойтын алтны үйлдвэр, 25 мянган тн жоншны хүдэр, 42 мянган тн зэргийн жонш олборлон, экспортлох хүчин чадалтай Бэрх, Хажуу-Улааны хайлуур жоншны уурхайнууд зэрэг 3 үйлдвэрийн бүрэлдэхүүнтэйгээр анх үйл ажиллагаагаа эхлүүлж байсан түүхтэй. Тус компани нь Монгол Улсын анхны гадаадын хөрөнгө оруулалттай уул уурхайн компанийн хувьд үүсгэн байгуулагдсан цагаасаа эхлэн жонш, үнэт металл болон бусад төрлийн ашигт малтмалыг олборлон баяжуулах, эрдэс түүхий эдийн нөөцийг өсгөх, улсын экспортын чадавхийг нэмэгдүүлэхэд үлэмж хувь нэмэр оруулан тэргүүн эгнээнд ажиллаж, Монгол улсын уул уурхайн салбарын 45 жилийн түүхийн ололт амжилтыг хамт бичилцсэн, уул уурхайн салбарын томоохон аж ахуйн нэгж болтлоо өсөн дэвжиж, өнөөдрийг хүртэл үйл ажиллагаагаа тогтвортой явуулж ирсэн.
Өнөөдрийн байдлаар тус компанид нийт 1,288 ажилтан, албан хаагчид ажиллаж байгаа бөгөөд Үндэсний их баяр наадам, Ардын хувьсгалын 97 жилийн ойн баяр болон "Монголросцветмет" ХХК үүсч хөгжсөний 45 жилийн ойг тохиолдуулан "Төрийн дээд одон медалиар Монголросцветмет" ХХК-ийн 24 ажилтан шагнагдаж байгаагаас Хөдөлмөрийн гавьяаны улаан тугийн одонгоор захиргааны ахмадын хорооны дарга Чулуунбаатар, Алтан гадас одонгоор есөн албан хаагч, хөдөлмөрийн хүндэт медалиар Дотоод хяналт, мониторингийн хэлтсийн ахлах мэргэжилтэн Доржсүрэн тэргүүтэй нийт 14 ажилтан шагнагдсан байна.
Сэтгэгдэл (0)
Сэтгэгдэл бичигдээгүй байна