Гадаад хэлний гүнзгийрүүлсэн сургалттай 18 дугаар сургуулийн сурагчдын эцэг эхийн төлөөлөл, багш, ажилчид Боловсролын газарт шаардлага хүргүүлж байгаа талаараа өнөөдөр сэтгүүлчдэд мэдээлэл хийлээ.Учир нь, тэд тус сургуульд хоёр жилийн хугацаанд захирлын алба хашиж байсан дүрслэх урлагийн багш мэргэжилтэй Х.Чинбатыг хууль, хяналтынханд дахин шалгуулах хүсэлтэй байгаагаа ч уламжлав.Тэдний өгч байгаа мэдээлэлээр захирал асан Х.Чинбат гэгч нь сургуулийн захирлаар ажиллаж байхдаа сурагчдын "Үдийн цай" хөтөлбөрөөс мөнгө, биеийн тамирын заалнаас олдог орлого зэргийг хувьдаа "завшдаг" байжээ. Мөн сургуульд шинээр элсэж буй элсэгчдээс хээл хахууль авч байсныг нь шалгалтаар тогтоосон байдаг аж.
Түүнийг дээрх шалтгаанаас үүдэж ажлаас нь чөлөөлөөд байжээ. Гэвч Х.Чинбатыг гурван шатны шүүх болон АТГ-аас гэм буруугүй гэж үзээд ажилд нь эгүүлэн томилох шийдвэрийг гаргасан байна. Хууль, хяналтынхны энэхүү шийдвэрийг эсэргүүцэж Х.Чинбатыг дахин шалгуулах хүсэлтэй байгаагаа тус сургуулийн эцэг, эхийн төлөөлөл хэллээ.Мөн түүнийг захирлаар ажиллаж байх хугацаанд сургуулийн дүрэм журам алдагдаж, хээл хахуульд их идэгдэж, гадаад багш нарын Монголд ажиллах гэрээг зөрчин тэдний нэр дээр цалин бичиж, албан тушаалаа урвуулан ашиглан улсын мөнгийг идэж сургуулийг хохироож байсан нь нотлогдож тогтоогдсон гэнэ.Түүнчлэн сургуулийн захирал нь удаа дараа солигдсноос болж сургуулийн дотоод дэг журам сөргөөр нөлөөлж, хүүхдүүдийн сурч боловсрох эрх зөрчигдөөд байна гэдгийг эцэг эхчүүдийн төлөөлөл онцоллоо.
Сэтгэгдэл (0)
Сэтгэгдэл бичигдээгүй байна