Ардчилсан нам гишүүн төвтэй, бодлогын нам болох шинэчлэлийн хүрээнд хийгдэж буй ажлуудын нэг "Хангайн бүсийн чуулга уулзалт - 2018" Сэлэнгэ аймгийн Баруунбүрэн суманд зохион байгуулагдлаа. Чуулганд нийслэлийн Чингэлтэй, Сүхбаатар дүүрэг, Хөвсгөл, Булган, Орхон, Сэлэнгэ аймгийн гишүүд дэмжигчдээс гадна Ардчилсан намын дэргэдэх байгууллагын төлөөлөл бүхий 1000 гаруй хүн оролцсон юм. Хангайн бүсийн чуулга уулзалтад оролцогч аймгууд тулгамдсан асуудлуудаа хэлэлцэж, санал солилцсон. Тухайлбал, Сэлэнгэ аймгийнхан үйлдвэрлэлийн бодлого үгүйлэгдэж байгааг онцоллоо. Сэлэнгийнхэн газар тариалан эрхлэхээс гадна жижиг, дунд үйлдвэр эрхлэлтээрээ улсдаа тэргүүлдэг. Гэвч сүүлийн хоёр жилийн хугацаанд тус аймгийн жижиг, дунд үйлдвэр зогсонги байдалд оржээ. Учир нь, 2012-2016 онд Засгийн газар болон орон нутгийн зүгээс хэрэгжүүлж байсан ЖДҮ эрхлэгчдэд чиглэсэн бодлого үндсэндээ зогссон. Өнөөгийн эрх баригчид үйлдвэрлэлийг дэмжих нь бүү хэл, айлын "Шоовдор" хүүхэд шиг хандаж байгаагаас шалтгаалж үйлдвэрлэгчидхүндхэн цаг үеийг туулж байгаагаа хэлж байлаа. Мөн үйлдвэрлэлээс гадна бүс нутгийн хувьд аялал жуулчлалыг өндөр түвшинд хөгжүүлэх боломжтой байгаа ч, мөн л төр засгаас дорвитой дэмжлэг үзүүлэхгүй байгааг хэлж байсан юм. Чуулганд оролцогч Хөвсгөлчүүдийн зүгээс, Олон улсын нисэх онгоцны буудалтай болж, дэлхийн жишигт нийцсэн үйлчилгээг үзүүлж, аялал жуулчлалыг нэрийн хуудсаа болгох хүсэлтэй. Гэвч энэ бүхнийг иргэдийн нуруун дээр "ачаад" орхих бус төрийн бодлого, бодит дэмжлэг зайлшгүй хэрэгтэй байгааг хэллээ. Үүний зэрэгцээ хэрээс хэтэрсэн улстөржилт, намчирхлын гайгаар Ардчилсан намын санаачилсан орон нутгийн иргэдийг орон сууцжуулах, аймгуудыг авто замаар холбох, иргэдэд үйлчлэх төрийн үйлчилгээг цахимжуулсан зэрэг олон ажлыг зогсоосонд орон нутгийн иргэд бухимдалтай байлаа. Өрх бүр нь үйлдвэрлэгч гэгддэг Сэлэнгэ нутгийнхан, анхдагчдын өлгий нутаг Булганчууд, хоймор нутагт оршихХөвсгөлчүүд гээд Монгол орны өнцөг булан бүрт аж төрж буй Ардчилсан намын жирийн гишүүдээс эхлээд ард түмэн эрх баригчдаас зөв бодлого, сэтгэл зүтгэлийг үгүйлж байгаагаа эрх баригчдад ийнхүү дайсан юм
Сэтгэгдэл (0)
Сэтгэгдэл бичигдээгүй байна