Ж.Эрдэнэбатын Засгийн газар бүрдэх гэж бас багагүй хэл ам болж байсныг олон хүн санаж байгаа болов уу. Тэднээс хамгийн их олны анхаарлыг татсан нь Эрчим хүчний сайдын томилгоо байсан. Тодруулбал эхлээд Эрчим хүчний сайдад Т.Энхтайваныг нэр зүтгүүлсэн. Гэвч мань хүнийг АТГ-аас ашиг сонирхлын зөрчилтэй хэмээн буцаасан. Үүний дараа Ц.Цэнгэлийг нэр дэвшүүлсэн ч мөн л АТГ хүлээж аваагүй. Харин эцэст нь МАН-ын бүлэг хуралдаж П.Ганхүүд Эрчим хүчний яамыг хариуцуулсан юм. Ийн олны танил бус, Саарал ордны сандал суудлын эзэн биш нөхөр тус яамны сайд болсон түүхтэй.
Мань хүний хувьд 1997 онд МУИС-ийн Эдийн засгийн сургууль төгссөн. Япон улсын Сэншүгийн их сургуульд эдийн засгийн магистр, Австралийн Сиднейн их сургуульд мастер хамгаалсан, Эрчим хүчний эдийн засагч мэргэжилтэй, Түлш, эрчим хүчний яамны Санхүү, хөрөнгө оруулалтын газрын дарга, Эрчим хүчний газрын орлогч даргаар ажиллаж байсан нэгэн гэдэг. Гэвч Ж.Эрдэнэбатын Засгийн газар огцорсноор угаас түмэнд танигдаагүй түүний сураг бүр алдарсан гэхэд болно. Ийн хэсэгтээ нам гүм байсан тэрбээр өнгөрсөн хавар гэнэтхэн л "Эрдэнэс Монгол" ХХК-ийн даргаар томилогдчихсон.
Тодруулбал "Эрдэнэс Монгол" ХХК-ийн төлөөлөн удирдах зөвлөл 2018 оны 5 сарын 18-ны өдөр хуралдаж, компанийн захирал Ц.Түмэнцогтыг чөлөөлж, Эрчим хүчний сайд асан Д.Ганхүүг шинээр томилсон юм.
Ийн "Эрдэнэс Монгол" ХХК-ийн даргаар томилогдоод ердөө дөрөвхөн сарын нүүрийг үзэж буй П.Ганхүүг шалгах ажлын хэсэг гарсан гэх мэдээ чих дэлсэв.
Судалж үзвэл мань хүн дарга болсноосоо хойш ажил дээрээ бараг үзэгдээгүй гэнэ. Тэгсэн атлаа компанийнхаа орон тоог 17-оор нэмэгдүүлсэн байх юм. Тэдгээр хүмүүс нь сайдын ойр дотнынхон мөн эсэхийг мэдэхгүй ч ямартаа ч компанид үргүй зардал болж байгаа нь тодорхой. Зөвхөн нэг ажилтны цалин нь багаар бодоход хоёр сая төгрөг гэхээр цалингийн зардал 34 сая төгрөгөөр нэмэгдсэн гэсэн үг.
Уг нь анх П.Ганхүүг "Эрдэнэс Монгол"-ын захирлаар томилогдоход ТУЗ-өөс тус байгууллагын ажилчдын орон тоог 88 ажилтантай байхаар баталж өгчээ. Харин одоо энэ тоо 105 ажилтанд хүрсэн байна. Нэмэгдүүлсэн албан тушаалд хэд хэдэн зөвлөхүүд нэрлэгдэж байгаа нь анхаарал татна. Хуучин "Эрдэнэс Монгол" компани гурван газартай, 18 захиралтай байсныг шинэ захирал нь өөрчилж, 7 захирал үлдээсэн байдаг. Саяхан газрын захирлын тоог 3-аас 8 болгож нэмсэн байна. Нийтдээ таваар нэмэгдүүлсэн гэсэн үг. ТУЗ-аар энэ бүтэц нь орсон аж. Тэр үед "Эрдэнэс Монгол" компанийн харьяанд "Эрдэнэс Тавантолгой" компани байсан учраас олон улсын зах зээлд гаргах бэлтгэлийг хангахын тулд таван газрыг нэмж байгуулах шийдвэрийг ТУЗ-өөс гаргасан байна /саяхан Засгийн газраас шийдвэр гарч, "Эрдэнэс Монгол"-ын харьяанаас "Эрдэнэс Тавантолгой"-г гаргасан билээ/. Гэвч тэр үед ТУЗ-өөс ажилтны тоог өөрчлөх шийдвэр бол гаргаагүй гэнэ.
Энэхүү асуудалтай холбогдуулан П.Ганхүүг шалгах ажлын хэсэг "Эрдэнэс Монгол" ХХК-ийн ТУЗ-өөс гарсан юм байна. Бүр тодруулбал тодорхой хугацаанд ажилчдын тоо нэмэгдсэнээс үүдэж, компанид нэмэлт зардал үүссэн юм байна. Үүнтэй холбогдуулан П.Ганхүү болон бусад захирлуудад хариуцлага тооцох асуудал яригдаж байгаа аж. Түүнчлэн ТУЗ-өөс ажлын хэсэг байгуулж, П.Ганхүү захирал болон шинээр томилогдсон газрын захирлуудын асуудлыг давхар хянаж үзэх юм байна. Тун удахгүй ажлын хэсгээс дүгнэлт гарч энэ асуудал илүү тодорхой болох биз ээ...
setguulch.mn
Сэтгэгдэл (0)
Сэтгэгдэл бичигдээгүй байна