АТГ-аас "Эрдэнэт" үйлдвэрийн захиралаар ажиллаж байсан Ч.Ганзоригийг яллагдагчаар татан, шалгаж байгаа талаар өнгөрсөн хоёрдугаар сард мэдээлж байв. "Эрдэнэт" үйлдвэрийн 51 хувь, ''Стандарт'' банктай холбоотойгоор Ч.Ганзориг болон тус үйлдвэрийн Хуулийн хэлтсийн дарга н.Мөнхжаргал нарт эрүүгийн хэрэг үүсгээд байсан. Тэгвэл урьд шөнө /2018.09.24-25/ Ч.Ганзоригийг саатуулсан байна.
Өнгөрсөн долоо хоногт шүүхээс "Эрдэнэт" үйлдвэрийн 49 хувийг төрд авсан нь хууль зөрчсөн гэсэн шийдвэрийг гаргасан. Үүнтэй холбогдуулан "Эрдэнэт"-ийн 49 хувьтай холбоотой шүүхийн маргаан эцэслэсэн талаар 49 хувийн эрх ашгийг хамгаалагчид мэдэгдэж байв. Ийнхүү "Эрдэнэт"-ийн 49 хувьтай холбоотой асуудал шүүхээр ороод удаагүй байтал тус үйлдвэрийн 51 хувийн талд өрнөж байсан хуулийн процесс эрчимжиж өнгөрсөн шөнө "Эрдэнэт" үйлдвэрийн захирлаар ажиллаж байсан Ч.Ганзоригийг саатуулсан бололтой.
Харин энэ талаар АТГ-аас албан ёсоор мэдээлэл өгөхдөө ""Жаст" групп Стандарт банкнаас их хэмжээний зээл авч ашигласан. Энэ хэрэгт тухайн үеийн "Эрдэнэт" үйлдвэрийн удирдлагууд холбогдон шалгагдаж байна. Яллагдагчаар татагдсан "Эрдэнэт" үйлдвэрийн захирал асан Ч.Ганзоригийг өнөөдөр прокуророос цагдан хорих саналыг шүүхэд тавиад байна. Гэхдээ Ч.Ганзоригийг 49 хувийн асуудал дээр биш "Жаст" группын асуудал дээр таслан сэргийлэх арга хэмжээ аваад шалгаж байгаа
Энэ хэрэг дээр нэлээн тодорхой хугацаанд шалгасан. Стандарт банкнаас авсан мөнгө хамаарал бүхий компаниудын үйл ажиллагаанд зарцуулагдсан нь тодорхой болсон. Иймээс түүний хамаарал бүхий иргэн, аж ахуйн нэгжүүдийн бүх хөрөнгийг нэг бүрчлэн гаргаж ирж, Монгол Улсын хэмжээнд байгаа хөрөнгийг бүртгэж, битүүмжилж, үнэлүүлэх ажиллагаа хараахан дуусаагүй байна. Гэхдээ маш цөөхөн аймгийн үнэлгээний асуудал тодорхой болбол мөрдөн шалгах ажиллагаа дуусна.
Энэ хэрэг дээр Ш.Батхүү, н.Мөнхжаргал н.Амарбат, н.Галбадрах Ч.Ганзориг нарын таван хүн шалгагдаж байгаа" гэсэн мэдээллийг өглөө.
Сэтгэгдэл (0)
Сэтгэгдэл бичигдээгүй байна