УИХ-ын 22 гишүүн бүрэн эрхээсээ түдгэлзэж, ЖДҮХС-гийн зээлтэй холбогдуулан хуулийн байгууллагад шалгуулахаа мэдэгдлээ.
Энэ талаар УИХ-ын гишүүн Ж.Бат-Эрдэнэ "ЖДҮХС-д төсөвлөсөн зээлийг Засгийн газрын болон УИХ-ын нэр бүхий гишүүд, яам тамгын газрын удирдлагууд эрх мэдэл албан тушаалаа урвуулан ашиглаж өөртөө болон өөрт хамаарал бүхий хүмүүстээ авч өгсөн нь улстөрчийн хувьд ёс зүйгүй үйлдэл. Гэтэл энэ ёс зүйгүй үйлдлийг дарагдуулж, зээл авсан гишүүдэд хариуцлага тооцохгүй өнгөрөх хандлагатай байна. Тиймээс УИХ-ын 22 гишүүн бүрэн эрхээсээ татгалзаж, хуулийн байгууллагад шалгуулахад бэлэн буйгаа албан ёсоор мэдэгдэж байна. Ёс зүйн дэд хорооны даргад энэхүү мэдэгдлээ хүргүүлж байна. Бид хуулийг чандлан сахихад бэлэн байна. Үүнийгээ бусад гишүүддээ ч үлгэрлэж, хууль хяналтын байгууллагаар шалгуулахыг уриалж байна" гэлээ.
УИХ-ын гишүүн Ж.Мөнхбат: Бид зарчмын байр сууриа албан бичгээр илэрхийлж, УИХ-ын гишүүний бүрэн эрхээсээ түдгэлзэж, ЖДҮ-ийн зээлийн асуудлаар шалгуулахад бэлэн байна гэдгээ илэрхийлж, энэхүү мэдэгдлээ Ёс зүйн хороонд хүргүүлж байна. ЖДҮ-чин гишүүдийн асуудлыг бүдгэрүүлэх ажил, алхам хүчээ авч байна. Энэ ажилд Засгийн газрын зүгээс тодорхой хэмжээний мөнгийг төсөвлөж байна гэх мэдээлэл гишүүдэд ирсэн. Мөн Нийслэлийн ерөнхий прокуророос нэр бүхий гурван гишүүний хэргийг АТГ-руу буцаасан гэх мэдээлэл ч байна. Ёс зүйгүй, хууль зөрчсөн үйлдэлд нь хариуцлага тооцох шаардлагатай. Монголын төрийг бүрдүүлж байгаа хүмүүс өөрсдөө ёс зүйг үлгэрлэж, шударга ёсыг үргэлжлүүлэх ёстой " гэлээ.
Сэтгэгдэл (0)
Сэтгэгдэл бичигдээгүй байна