УИХ ДАХЬ МАН-ын бүлгийн 64 гишүүн 32 32-оороо хуваагдаад удаж байна. Хоёр хар хэрээ нэгийнхээ харыг гайхна гэгчээр 60 тэрбум, ЖДҮ-чид гэж хоорондоо маргасаар багагүй хугацаа өнгөрлөө. МАН-ын бүлгийн гишүүд учраа олох гэж оролдлого хийж ажлын хэсэг байгуулжээ. М.Энхболдын талаас УИХ-ын гишүүн Ж.Эрдэнэбат, С.Бямбацогт, Л.Энх-Амгалан, Д.Оюунхорол харин У.Хүрэлсүхийн талаас УИХ-ын гишүүн Ч.Улаан, Х.Нямбаатар, Г.Занданшатар, Т.Аюурсайхан нар ажлын хэсэгт багтаж. Хоёр талын ажлын хэсгийг Ч.Улаан, Л.Энх-Амгалан нар ахалж гэнэ. Эвлэрэх зорилготой ажлын хэсэг төрийн ордонд нэг удаа, Шангрилад хоёр дахь удаагаа хятад хоолны газарт хуралджээ. М.Энхболдыг УИХ-ын даргаас нь огцруулахгүй авч үлдэх ганцхан болзолыг тавьсан харин нөгөө тал нь энэ саналыг огт хүлээж авах боломжгүй гээд хоёр тийшээ хараад суучихдаг аж. Ийнхүү нэг хүний албан тушаал ярьж эхэлсэн хурал сүүлдээ хэрүүл болоод өндөрлөдөг тухай эх сурвалж бидэнд мэдээлсэн юм. Эндээс харахад МАН-ын хагарал эргэж эвлэхээсээ өнгөрсөн бололтой юм.
Сэтгэгдэл (0)
Сэтгэгдэл бичигдээгүй байна