Улаанбаатар хот 2019 оныг даргагүй угтсан. Оны өмнөхөн томилох ёстой байсан ч МАН доторх хагарал хотын даргаа тодруулж чадаагүй. Нийслэлчүүд шинэ оноо угтаад 10 хонож байхад ч захирагч тодроогүй л байна.
МАН-ын Удирдах зөвлөлөөс хотын даргад НИТХ-ын дарга С.Амарсайханыг дэмжиж саналаа хүргүүлсэн. Төв намаасаа ирсэн саналыг НИТХ-ын МАН-ын бүлэг хүлээж авахгүй хуралдахгүй гүрийсээр л... Энэ их тэвчээр, энэ их гүрийлт ямартай ч нийслэлчүүдэд ашиг авч ирэхгүй нь ойлгомжтой.
Нийслэл Улаанбаатар хотын дарга болох өрсөлдөөнд С.Амарсайхан, Б.Мөнхбаатар, С.Мөнхчулуун, П.Баярхүү нарын нэр дуулдаж буй. Ерөнхий сайд, МАН-ын дарга У.Хүрэлсүхийн талаас С.Амарсайханыг хотын дарга болох замыг засч Б.Мөнхбаатарыг Барилга хот байгуулалтын дэд сайдаар томилж дэвшүүлэн холдуулсан гэж хэлэхэд хилсдүүлсэн болохгүй.
Одоогийн байдлаар У.Хүрэлсүхийн талаас С.Амарсайхан, М.Энхболдын талаас П.Баярхүү, төлөөлөгчид дотроосоо С.Мөнхчулууныг дэвшүүлэхээр яригдаад эхэлжээ. Нийслэлийн иргэдийн хурлын дарга С.Амарсайханы төрсөн ах нь С.Отгонбаяр нь АН-ын гишүүн. Дээр нь С.Отгонбаяр нь Монгол улсын Ерөнхийлөгч Х.Баттулгатай худууд. Тиймээс С.Амарсайхан нь хүний өөрийн нам талаасаа дэмжлэгтэй учир хотын дарга болох өндөр магадлалтай. Тэрээр 1973 онд төрсөн эрхзүйч мэргэжилтэй нэгэн. Харин 60 тэрбумын талаас буюу М.Энхболдын нутгийн дүү П.Баярхүү нь 1974 онд төрсөн эрхзүйч мэргэжилтэй юм байна. Хотын даргад ЖДҮ талаас С.Амарсайхан, 60 тэрбумын талаас П.Баярхүү дэвшин үзэлцэж байхад дундын зооноос С.Мөнхчулуун орж иржээ. С.Мөнхчулуун нь 1979 онд төрсөн инженер мэргэжилтэй, СХД-ээс НИТХ-д сонгогдсон бөгөөд түүнд дэмжлэг байхгүй учир хотын дарга болох магадлал хамгийн тааруу нь. Яг одоо НИТХ-ын тэргүүлэгчид хуралдаж Нийслэлийн засаг даргыг сонгох хурлыг товлох учиртай. Гэвч хэн нь дарга болохыг цаг хугацаа харуулах биз ээ.
Сэтгэгдэл (0)
Сэтгэгдэл бичигдээгүй байна