Шведийн нийслэл Стокгольм хотын Странгнас сүмд өнгөрсөн оны долоодугаар сард нэгэн дуулиант дээрмийн хэрэг гарч 17-р зуунд Есдүгээр Карл хаан болон хатан Кристина нарийн тэргүүндээ залж байсан алт, үнэт эдлэл, шүр сувдаар чимэглэсэн титэм, эрх мэдлийг нь илэрхийлсэн үнэт бөмбөлөг зэрэг алдагдсан билээ. Тухайн үед бүлэг дээрэмчин этгээд хурдны завь зэргийг ашиглан маш өндөр зохион байгуулалттай хулгайлсан нь Холливуудын киног санагдуулам байсан талаар хэвлэлүүдээр шуугисан. Тэгвэл өнгөрсөн мягмар гарагт Стокгольм хотын захын хэсгээс тэдгээр түүхэн эд өлгийн үнэт зүйлсийг хогийн савнаас олсон талаар орон нутгийн цагдаагийн газар мэдээллээ. Онцлох шинж тэмдгийн хувьд дээр дурдсан титэм, бөмбөлөг зэрэгтэй тохирч байгаа ч 100 хувь баталгаатай болохын тулд нэмэлт үзлэг хийж байгаа гэж албаныхан учирлав. Ямартай ч эл хулгайн хэрэгтэй холбоотой нэг этгээдийг баривчлан саатуулж, шүүх хурлыг нь хийхээр бэлтгэж байгаа юм байна. Энэ мэтчилэн эртний хаадын үнэт зүйлсийг хулгайлах хэрэг дэлхийн өнцөг булан бүрт гардаг бөгөөд үүнээс өмнө Венецэд хадгалагдаж асан Катарын эзэн хааны гэр бүлийн үнэт эдлэл хулгайлсан хэрэг гарч байлаа
Сэтгэгдэл (0)
Сэтгэгдэл бичигдээгүй байна