АНУ-ын Ерөнхийлөгч Дональд Трамп Умард Солонгосын залуу удирдагч Ким Чен Унтай хийх хоёр дахь уулзалтаа энэ сарын 27-28-ны өдөр Вьетнамын нийслэл Ханой хотод хийх болсон гэж мэдэгдлээ. Энэ сарын эхээр гарсан мэдээллээр хоёр талын удирдагчийн уулзах хотоор Да Нан, Ханой хоёр нэрлэгдэж байсан ч эцсийн шийдвэрээр нийслэл Ханойг сонгосон нь энэ аж. Мөн тэрээр энэ удаагийн уулзалтаар энх тайвныг цогцлооход дэвшил гаргах найдлага тавьж буйгаа Твиттер дахь хуудсаараа жиргэсэн байна. Түүнээс гадна "Умард Солонгос улс нь эдийн засгийн асар хүчирхэг орон болно. Ким даргын хувьд үүндээ гайхшрах байх. Харин би үгүй. Учир нь түүний ямар чадварлаг хүн болохыг би мэдэж авсан. Умард Солонгос улс пуужин болно гэхдээ эдийн засгийн пуужин болно" гэж Д.Трамп жиргээндээ онцолсон байгаа юм. Тэд өмнө нь буюу өнгөрсөн оны зургаадугаар сард Сингапурт уулзаж, Пхеньяны цөмийн хөтөлбөрийг зогсоож, бүс нутгийн төдийгүй дэлхийн энх тайвныг хамгаалах талаар ярилцаж, тохиролцсон. Гэвч хэлэлцээр төдийлөн үр дүнтэй хэрэгжээгүй учир энэ удаагийн уулзалтаар өмнөх яриа хэлэлцээрийг хэрэгжүүлэхэд хоёр талаас хэрхэн хүчин чармайлт гаргах талаар ярилцах нь нэгэнт тодорхой болчихоод байгаа билээ
Сэтгэгдэл (0)
Сэтгэгдэл бичигдээгүй байна