ОУВС-гийн хөтөлбөрийн хүрээнд 2018 онд орж ирэх ёстой санхүүжилтийн багахан хувь нь орж ирээд үлдэгдэл нь орж ирээгүй билээ. Тодруулбал, 2018 оны тавдугаар сараас хойш Азийн хөгжлийн банкнаас л 500 гаруй сая ам.долларын санхүүжилт олгожээ. Үүний 300 сая ам.доллар нь төсвийн дэмжлэг, 200 нь төсөл хөтөлбөрийг санхүүжүүлэх хэлбэрээр орж ирсэн байна.
Хөтөлбөр ёсоор тохирсон санхүүжилт яагаад зогсонги байгаа талаар Сангийн сайд Ч.Хүрэлбаатараас тодрууллаа. Тэрээр "Арилжааны банкуудад 2018 оны арванхоёрдугаар сарын 31-нийг хүртэл өөрийн хөрөнгөө нэмэгдүүлэх үүргийг өнгөрсөн онд өгсөн. Энэ дагуу банкууд өөрийн хөрөнгөө нэмэгдүүлсэн. Гэвч тодруулах шаардлагатай зүйлүүд байна гэж үзсэн. Тиймээс ОУВС-гийн санхүүжилт бага зэрэг саатаад байгаа" гэсэн юм.
2017 онд ОУВС-гийн хөтөлбөрийн хүрээнд арилжааны банкуудад Активын чанарын үнэлгээ хийсэн. Уг шалгалтаар хөрөнгийн дутагдалтай банкуудад өөрийн хөрөнгөө нэмэгдүүлэх хугацаа өгсөн билээ. Тэгвэл өөрийн хөрөнгөө нэмэгдүүлсэн банкууд хөрөнгийн эх үүсвэрээ тайлагнах ёстой юм байна. Нэмэгдүүлсэн эх үүсвэрээ хаанаас хэрхэн орсон, бохир уу, цэвэр үү гэдгээ Монголбанкинд тайлагнах юм.
Үүнээс гадна манай улс ОУВС-тай байгуулсан гэрээгээ хэд, хэдэн удаа зөрчиж, тохирсон зүйлүүдээсээ буцаж, хэрэгжүүлэх ёстой ажлуудаа хийхгүй байгаа учраас санхүүжилт зогсох гол шалтгаан болж байгааг зарим хүн тайлбарлаж байгаа юм.
Сэтгэгдэл (0)
Сэтгэгдэл бичигдээгүй байна