Паркын урд Энхтайваны гүүрний доор 11,8 га газрыг хашаалж зургаан жилийг ардаа үджээ. Уг газрын зөвшөөрлийг анх 2013 онд M&G констракшн усан парк барих төслөөр авсан гэх мэдээлэл байгаа юм.
Тодруулбал Усан парк бүхий Азийн хамгийн том энтертаймент төв барих бөгөөд 2018 онд усан парк, спорт цогцолборын ажил дуусна гэж төлөвлөж байгаа гэсэн ярилцлагыг 2016 онд M&G констракшны гүйцэтгэх захирал А.Амарбаясгалан мэдээллийн сайтуудад өгчээ. Түүний "Усан парк бүхий азийн хамгийн том энтертаймент төв барих гэж байна" гэсэн гарчигтай сүржин ярилцлага өнөөдөр ажил нь ч эхлээгүй замхарсан.
Мөн M&G констракшны гүйцэтгэх захирал А.Амарбаясгалан ярилцлагадаа өндрөөс усаар гулгаж гардаг зургаан замтай хиймэл далайн эрэг бүрдүүлнэ гэж ярьж байжээ.Өнгөрсөн онд ашиглалтад орсон байх ёстой усан парк жилийн дараа ч хашаалсан байдалтай хэвээр байна. Энэ талаар албаныханаас тодруулахад одоогоор мэдээлэлгүй байна гэсэн хариултыг өглөө. Энхтайвны гүүрний доор 11,8 га газар "Усан парк бүхий Азийн хамгийн том энтертаймент төв"-ийн бүтээн байгуулалтаа хүлээсээр байна. Өмнө нь Тэнгис кино театрын хажууд усан оргилуур барина гэсэн бичигтэй барилгын цэнхэр хашаа татсан байж байгаад шилэн өндөр оффис одоо сүндэрлээд байгаа билээ.
Н.МИЖИДМАА
Сэтгэгдэл (0)
Сэтгэгдэл бичигдээгүй байна