Дэлхий даяар мансууруулах бодис, хар тамхины түүхий эдийг устгах тэмцэл явуулж байхад, энэ тэмцлийн манлайлагчдын нэг АНУ-д яагаад ийм компани хувьцаагаа хөрөнгийн бирж дээр нь гаргадаг билээ? гэсэн асуулт олны анхаарлыг ихэд татаж байна. Хар тамхины ургамал гэгддэг каннабис тариалдаг компани нь Америкийн хөрөнгийн бирж дээр хувьцаагаа гаргахын тулд хуулийн цоорхойг чадварлагаар ашиглажээ.
АНУ-ын зарим мужид каннабисыг эмчилгээ ба нөхөн сэргэлтийн журмаар тариалах, бага хэмжээгээр хэрэглэхийг зөвшөөрдөг ч Холбооны хэмжээнд хориотой хэвээр байдаг тул Америкийн "Nasdaq" ба Нью-Йоркийн хөрөнгийн биржүүд нь ийм компанийг "IPO" хийхийг хориглодог.
Иймд эхлээд каннабис тариалахад хөрөнгө оруулалт хийдэг "MTech Acquisition Corp" компани нь каннабисыг тариалах, борлуулах бүх л үйл явцыг дэмжихэд зориулагдсан программ хангамж боловсруулагч "MJ Freeway LLC" компанитай нэгдэн "Akerna Corp" нэртэй хувьцаат компани үүсгэжээ. Харин "MJ Freeway LLC" компани нь программ хангамж боловсруулдаг гэдгээрээ хувьцаагаа бирж дээр хэдийн борлуулдаг байсан тул түүнтэй нэгдэнэ гэдэг нь шинээр үүссэн "Akerna Corp" компанид цаашид "IPO" боломжийг шууд нээж өгсөн байна.
"Akerna Corp" ийнхүү мягмар гарагаас эхлэн бага хөрөнгжилт бүхий компаниудад зориулагдсан "Nasdaq Capital Market" хөрөнгийн бирж дээр хувьцаагаа гаргахад хувьцааных нь үнэ нэг өдрийн дотор шууд 28 хувиар өсч нэг бүр 15,35 доллар болсон. Лхагва гарагт 56 хувиар өсч нэг бүр нь 23,91 доллар болжээ.
Каннабис тариалдаг компанийн хувьцаа ийнхүү хэдхэн өдрийн дотор огцом өсч байгаад гайхах зүйлгүй гэдгийг мэргэжилтнүүд онцолж байна. Учир нь, анагаах, эмнэлэг гэх мэт янз бүрийн зорилгоор каннабисыг тариалахыг аажмаар зөвшөөрч эхэлж байгаа нь ийм төрлийн компаниудын өмнө борлуулалтын ихээхэн ирээдүйтэй зах зээлийг нээж байгаа аж. Үүнийг хөрөнгө оруулагчид хэдийн тооцсон байна. "Grand View Research" компанийн гаргасан мэдээгээр албан ёсоор зөвшөөрөгдсөн каннабисын борлуулалтын зах зээл нь жилд дунджаар 34,6 хувиар өссөөр 2025 он гэхэд 146 тэрбум долларт хүрнэ.
Сэтгэгдэл (0)
Сэтгэгдэл бичигдээгүй байна