Улсын төсвөөр хайгуул хийсэн томоохон орд газруудыг төр мэдэлдээ авах ёстой. Үүнийг Үндсэн хуулинд заасан байдаг. Одоогоор 500 орчим ордыг улсын төсвөөр хайсан байна. Гэвч хуулинд заасанчлан төр авдаг нь тодорхойгүй байгаа юм. Үүн дундаас "Цагаан суваргын орд"-ын асуудлаар Ашигт малтмал, газрын тосны газрын дарга Х.Хэрлэнгээс зарим зүйлийг тодрууллаа.
Монгол Улсын Ерөнхийлөгчийн Тамгын газрын дарга З.Энхболд "цагаан суваргын ордыг төр мэдэлдээ авах ёстой" гэж мэдэгдсэн. Энэ дагуу ямар нэгэн алхам хийсэн үү?
Хуульд энэ талаар гарц гаргалгааг заасан байдаг. Тодруулбал "улсын төсвөөр хайгуул нь хийгдсэн орд газрын 50 хүртэлх хувийг төр эзэмшиж болно" гэж заасан байдаг. Энэ дагуу ажил хийгдээд явж байна.
Цагаан суваргын ордыг улсын төсвийн хөрөнгөөр хайж олсон уу?
Ямар нэгэн орд газрын нэр зааж ярьмааргүй байна.
Улсын төсвийн хөрөнгөөр хичнээн орд газрыг илрүүлсэн байдаг вэ?
Монгол улсын хэмжээнд байгаа орд газруудын судалгааг хийж байна. Улсын төсвийн хөрөнгөөр хичнээн орд газрыг илрүүлсэн, харин хувийн хөрөнгөөр хичнээн орд газрыг хайсан бэ гэдгийг ялгаж салгаж байна. Одоогийн байдлаар 500 орчим ордыг улсын төсвийн хөрөнгөөр хайсан байдаг. Эдгээр ордыг хайхад хичнээн төгрөг гарсан бэ гэдгийг тооцоолж байна.
Эдгээр 500 ордын 50 хүртэлх хувийг төр авъя гэж бодъё. Тэгвэл төсвөөс хичнээн төгрөг гарах вэ?
Мөнгө гаргахгүй, мөнгө төлөхгүй шууд 50 хүртэл хувь нь төрийн мэдэлд ирэх боломжтой.
"Цагаан суваргын ордыг ашиглахад МАК–ийн зүгээс 40 сая ам.доллар гаргасан. Энэ мөнгөө төлөөд төр авч болно" гэж УИХ-ын гишүүн Н.Номтойбаяр хэлж байсан. Цагаан суваргыг төр авахын тулд хичнээн төгрөг төлөх ёстой вэ?
Үүнийг орд ашиглах гэрээний дагуу хоёр талаас асуудлыг ярих ёстой. Тус ордын 50 хүртэлх хувийг төр авах боломжтой.
Цагаан суваргын ордыг авах чиглэлээр МАК-тай ярилцсан, уулзалдсан зүйл байгаа юу?
Одоогоор ямар нэгэн уулзалт болоогүй байна. Компани энэ хүсэлтийг хүлээж авах эсэхийг бид мэдэхгүй байна. Хоёр талын санал, хүсэлт, зорилго нийлж байж орд ашиглах гэрээг байгуулах ёстой.
Сэтгэгдэл (0)
Сэтгэгдэл бичигдээгүй байна