Өмнөд Африкийн Бүгд Найрамдах Улсын цагаан арьст уугуул болох бүүр үндэстэний фермерүүд хөдөө аж ахуйн эрхлэх газраар ОХУ-ын Буриад улсыг сонгон сонирхож байгаа тухай "МК в Бурятии" сонин мэдээлжээ. Өмнөд Африкийн фермерүүдийн хамгийн том холбоо "Трансвааль"-ийн төлөөлөгч Иоханн Дю Туагаар удирдуулсан төлөөлөгчид Буриадад айлчилсан байна. Тэд Буриад улсын цаг агаар, хөдөө аж ахуй эрхлэх боломж, үндэстэн хоорондын харилцаа зэрэг зүйлсийг сонирхожэ. Улмаар наймдугаар сард илүү өргөн бүрэлдэхүүнтэйгээр айлчлан нарийвчилсан судалгаа хийх аж.
Өмнөд Африкийн фермерүүд нутгаасаа нүүж, өөр газар суурьших боломжийг судлах хүрээндээ Орос даяар ийм айлчлал хийсэн байна. Тухайлбал, Хойд Кавказ, Крымийн хойг, Ставрополийн хязгаар, Ростов муж зэрэг газруудаар айлчилжээ. Гэвч Буриадад бусад газруудаас давуутай гэхээр зүйлс бий гэж үзсэн аж. Бусад нутагт цаг агаар нь илүү дулаан, хөрс нь илүү үржил шимтэй ч үнэ ихтэй, чөлөөтэй газар байхгүй. Харин Буриад ашиглаагүй тал газар арвин, үнэ харьцангуй хямд. Мөн аж ахуй эрхлэх хүнд 1 га газар үнэгүй өмчлөх эрх өгдөг тусгай хөтөлбөр Өвөр Байгалийн хоёр ч нутагт хэрэгжиж байгаа аж.
Өмнөд Африкийн бүүрүүд Буриадад мал аж ахуй эрхлэх, хүнсний ногоо ба чацаргана гэх мэт жимс, жимсгэнэ тариалах боломжтой гэж үзсэн байна. Гэхдээ эхний удаад Буриад руу хэдхэн гэр бүл л нүүж ирэх бололтой.
ӨАБНУ-д 1990-ээд оны эхээр арьсны өнгөөр ялгаварлан гадуурхах дэглэм нуран унасны дараа цагаан арьстанууд, түүний дотор фермерийн аж ахуй эрхэлдэг бүүрүүд хүнд байдалд орсон. Хар арьст олонхын төлөөлөл болсон Засгийн газар нь сүүлийн жилүүдэд цагаан арьст фермерүүдээс газрыг нь хураан авч хар арьстнуудад өгөх бодлого эрчимтэй явуулж байгаа аж.
Сэтгэгдэл (0)
Сэтгэгдэл бичигдээгүй байна