Хятадын Ляонини мужийн Далянь хотноо долоодугаар сарын эхээр XIII "Зуны Давос" эдийн засгийн форум эхлэх гэж байна. Энэхүү томоохон арга хэмжээнд Хятадын талаас БНХАУ-ын Төрийн зөвлөлийн тэргүүн Ли Кэчан оролцохоор болсон тухай Хятадын Гадаад харилцааны яам мэдэгджээ.
Хятадын Ерөнхий сайд нь арга хэмжээг нээн үг хэлсний дараагаар Давосын дэлхийн эдийн засгийн форумын тэргүүлэгч Клаус Шваб болон оролцох гадаадын удирдагч нартай уулзана. Мөн бизнес, хэвлэл мэдээллийн төлөөлөлтэй уулзах юм байна.
Энэ удаагийн форум нь "Манлайлал 4.0: Даяарчлалын шинэ эринд амжилттай байх" гэсэн уриан дор явагдах бөгөөд дэлхийн 100 гаруй орны 2000 гаруй улстөрч, бизнесмэн, эрдэмтэд, сэтгүүлчид оролцох юм.
Швейцарийн Давос дахь эдийн засгийн форумыг зохион байгуулагч Клаус Шваб нь 2005 онд тус арга хэмжээтэй адил түвшний эдийн засгийн арга хэмжээг Хятадад зуны улиралд зохион байгуулж байх саналыг гаргасан байдаг. Энэ саналын дагуу 2006 оны зургаадугаар сард Бээжин хотноо Дэлхийн эдийн засгийн форумын төлөөлөгчийн газрыг байгуулж, 2007 оноос Хятадын аль нэгэн хотод дэлхийн олон орны удирдагч нар уулздаг уламжлалтай болсон.
Сэтгэгдэл (0)
Сэтгэгдэл бичигдээгүй байна