"In The Style" брэнд нь мариалаг бүсгүйчүүдийг өөрийн биеийг гололгүй хувцаслаж байхыг уриалсан сурталчилгаандаа гоолиг загвар өмсөгч оролцуулаад интернет хэрэглэгчдийн уур хилэнг хөдөлгөжээ. Брэндийн удирдлага нь сурталчилгаандаа Чесси Кинг нэртэй блогчин эмэгтэйг урьж, мариалаг долоон эмэгтэйн хамт зогсоон зургийг нь дарсан юмсанж. Бусад долоон эмэгтэй нь мариалаг, арьс арчилгаандаа тусгай хэрэгсэл гэх зүйлс ашигладаггүй, ердийн эмэгтэйчүүд байж. Энэ зургийг "In The Style" нь өөрийн "Instagram" хуудсан дээрээ байршуултал тус брэндийг сонирхдог хүмүүс нь эрс шүүмжилж эхэлжээ.
Нэг нь "Миний амьдралдаа харж байсан хамгийн тэнэг зүйл. Хүмүүсийг биеэ гололгүй эерэг ханддаг болгоход зориулсан байтал гоолиг биетэй хүн хувцсыг нь өмсдөг гэнэ ээ?" гэсэн бол өөр нэг нь "Тарган модель хаана байна вэ? Инээд хүрч байна. Танай хуудсуудыг эргүүлж хартал та нар бүгд нэг хэвийн биетэй хүмүүстэй л ажилладаг юм байна" гэсэн бол өөр нэг нь "Хэвийн биетэй хүн сурталчилгаандаа оруулчихаад бодипозитивын тухай ярьж болдог юм уу" гэж уурлажээ.
Уурлаж хилэгнэсэн хүн дэндүү олон байсан тул брэндийн үүсгэн байгуулагч АдамФрисби нь Чесси Кинг гэдэг модель өөрийн биеийг гололгүй эерэг хандах хөдөлгөөний идэвхтэн, биеэ байгаа чигээр нь, бүх дутагдал сул талын хамт олон нийтийн сүлжээнд харуулахаас айдаггүй блогчин болохоор сонгон авсан гэж тайлбарлахаас өөр аргагүй болсон байна.
Бодипозитив хөдөлгөөн нь гоолиг биеийг сурталчилж, бүсгүйчүдэд тулган хүлээлгэж байгааг эсэргүүцэн гарч ирсэн үзэгдэл. Энэ хөдөлгөөнийхөн эмэгтэй хүн моод хөөж туранхай болох гэх хэрэггүй, хүн өөрийн биеийг өөлж, гололгүй ямагт эергээр хандаж сурах хэрэгтэй гэдэг.
Сэтгэгдэл (0)
Сэтгэгдэл бичигдээгүй байна