Энэтхэгийн Баруун Бенгали мужид амьдардаг эмэгтэй 1,6 кг алт мөнгөн эдлэл, зоос, гоёл залгисан байсан тухай "Hindustan Times" сонин мэдээлж байна. Руни Хатун гэгч 22 настай эмэгтэй гэдэс нь хүчтэй базалсан, дотор нь байнга муухай оргидог гэсэн оноштойгоор эмнэлэгт хүргэгджээ. Эмч үзлэг хийхэд хоол идсэний дараа тогтмол бөөлждөг болоод байгаа гэсний дагуу рентген зургийг авч. Ингэхэд ходоодонд нь асар их металл эд зүйлс байгаа нь илэрч хагалгаанд орсон байна.
Хагалгаа хийгээд Руни Хатуны ходоодноос 69 гинж, 80 ээмэг, 46 зоос, 11 хамрын бөгж, 5 бугуйн цаг гарч ирсэн байна. Ходоодноос гарч ирсэн нийт алт мөнгөн эд зүйлс 53 мянган фунтын үнэ хүрчээ.
Энэ эмэгтэй хагалгааны дараа л эдгээр эд зүйлсийг санаатай залгисан гэдгээ хүлээн зөвшөөрсөн байна. Түүний хамаатан нь "Гэрээс гоёл, зүүлт алга болоод байгааг бид анзаарсан л даа. Тэгээд тэр тухай асуух болгонд уйлаад эхэлдэг байсан тул сүүлдээ ярихаа больсон" гэж ярьжээ. Бүсгүйг сэтгэцийн эмчид үзүүлэхээр болсон байна.
2018 онд Энэтхэгт өөр нэгэн эмэгтэйн ходоодонд хагалгаа хийгээд 1,5 кг төмөр эрэг, гоёл чимэглэл зэрэг зүйлс гаргаж ирсэн явдал болж байсан. Тэгэхэд сэтгэцийн эмч нар үзээд эмэгтэй нь үзүүртэй, ирмэгтэй зүйл өөрийн мэдэлгүй залгих хүсэл төрүүлдэг акуфаги нэртэй сэтгэцийн тун ховор эмгэгээр өвдсөн байсныг тогтоож байсан аж.
Сэтгэгдэл (0)
Сэтгэгдэл бичигдээгүй байна