Нью-Йоркийн Бронкс дүүрэгт эцэг нь нэг ойтой ихэр хүүхдүүдээ машиныхаа арын суудалд мартан орхиж ажилдаа яваад аминд нь хүрсэн эмгэнэлтэй хэрэг гарсан тухай "New York Post" портал мэдээлсэн байна.
39-н настай Хуан Родригес гэгч нь эмнэлэгт ажилладаг бөгөөд нэг ойтой охин Марица, хүү Фениксээ "Honda Accord" машины арын суудалд өглөө 8 цагт мартаж буугаад орой 16 цагт ажил тараад ирэхэд хүүхдүүдийнх нь амнаас цагаан хөөс сахарсан байжээ. Яаралтай тусламж үзүүлэх гэсэн ч нэгэнт оройтсон байж. Хариуцлагагүй эцэг цагдаагийн газарт "Би ажилдаа ирэхээс өмнө хүүхдүүдээ цэцэрлэгт нь өгчихсөн юм шиг санаад тэгээд ажилдаа болоод мартчихаж... Тэгээд миний хүүхдүүд нас барчихлаа, би хүүхдүүдээ алчихлаа" гэж мэдүүлэг өгчээ.
Шүүхийн шийдвэр гарах хүртэл Родригесийг 100 мянган долларын барьцаатайгаар түр суллаж гадуур байцааж байгаа аж. Хүүхдүүд амиа алдсан өдөр Нью-Йорк хотод 1980-аад оноос хойших хамгийн халуун өдөр болсон гэдгийг "New York Post" сайт онцолж байна. Энэ хэрэгтэй холбоотойгоор халуунд, нартай үед машинд жаахан хүүхдийг харах хүнгүй орхих нь маш аюултай гэдгийг мэргэжилтнүүд анхааруулжээ. Гадаа агаарын температур ердөө +15 байлаа ч хурц нартай үед машины дотор +40 градус хүрч халдаг.
Сэтгэгдэл (0)
Сэтгэгдэл бичигдээгүй байна