Монгол Улсын Ерөнхийлөгч Х.Баттулга АНУ-д хийж буй төрийн айлчлалын хүрээнд Цагаан ордонд зочилж АНУ-ын Ерөнхийлөгч Доналд Трамптай уулзлаа.
Энэ үеэр АНУ-ын Ерөнхийлөгч Доналд Трамп Монгол Улсыг "хоёр том хясааны дунд буй сувд" гэж зүйрлэн хэлж уулзалт халуун дулаан уур амьсгалтай болжээ. Албаны хүмүүс уулзалтыг тав орчим минут үргэлжлэхээр төлөвлөсөн боловч 40 орчим минутын турш өрнөжээ.
Уулзалтын сэдэв голдуу Монгол Улсын дэлхийд тэргүүлдэг салбар болох тансаг зэрэглэлийн ноолууран бүтээгдэхүүнийг АНУ-д татваргүй худалдаалах чиглэлд өрнөлөө. Мөн АНУ-ын зүгээс Монголын ашигт малтмал, байгалийн ховор элементийн салбарт хөрөнгө оруулах, Батлан хамгаалах салбарт хамтран ажиллах зэрэг чиглэлд яриа хэлцэл өрнөсөн байна. Тус улсын албаны хүмүүсийн мэдэгдэлд дурдсанаар хоёр их гүрний дунд орших, далайд гарцгүй Монгол Улсын нийт экспортын 90 орчим хувь нь өрд хөрш БНХАУ руу чиглэдэг, эдийн засгийн хувьд хэт хараат. Тиймээс энэхүү айлчлалын хүрээнд Монгол Улсын хөгжилд бодит хувь нэмрээ өгч чадах хэд хэдэн чиглэлд АНУ-ын зүгээс дэмжлэг үзүүлж, хамтран ажиллах чиглэлд гэрээ хэлцэл хийгдлээ гэсэн юм.
Мөн айлчлалын өмнө Монгол Улс нь Өмнөд Солонгос, Хойд Солонгос болон Япон улстай найрсаг харилцаатай орон гэдэг утгаараа бүс нутаг дахь аюулгүй байдал, Солонгосын хойгийн асуудалд чухал зуучлагч тал болох талаар АНУ-ын хэвлэлүүд онцолж байв. Тиймээс ч АНУ-ын Ерөнхийлөгч Доналд Трамп болон Хойд Солонгосын удирдагч Ким Жон Ун нарын дараагийн дээд хэмжээний уулзалт болох газрыг Монгол Улсын нийслэл Улаанбаатар хот гэж таамаглаж байсан юм. Харин Монгол Улсын Ерөнхийлөгчийн Цагаан ордонд хийсэн айлчлалын үеэр одоогоор энэ асуудлаар ямар нэгэн төлөвлөсөн зүйл байхгүй болох нь харагдлаа гэж мэдээлжээ.
Монгол Улсын Ерөнхийлөгч хамгийн сүүлд 2011 онд АНУ-д төрийн айлчлал хийж байв. Харин энэ удаагийн айлчлалаар Монгол Улсын Ерөнхийлөгч Х.Баттулга АНУ-ын Ерөнхийлөгч Доналд Трампын хүү Барон Трампд монгол морь бэлэглэв. Энэ талаар АНУ-ын Ерөнхийлөгч Доналд Трамп сэтгүүлчдэд хандан "та бүхэн бэлгийн морины зургийг харж амжсан уу. Үзэсгэлэнтэй" гэсэн юм. Тэрээр уг моринд "Ялалт" гэдэг нэр өгсөн бөгөөд тус улсын хэвлэлүүд Чингис хааны үеэс эхлэн морь нь Монголчуудын хувьд хүндтэй хүмүүсдээ өгдөг хамгийн чухал бэлэг, билэгдэл байсаар ирснийг онцолсон байна.
Сэтгэгдэл (0)
Сэтгэгдэл бичигдээгүй байна