Наймдугаар сарын 5-нд Хонконгийн нисэх буудлын диспетчерүүд бүх нийтийн ажил хаялтад нэгдэн, эмчийн магадлагаагаар олноороо чөлөө авсны улмаас 200 гаруй нислэг хойшилсон тухай "RTHK" мэдээлж байна. Иймд Хонконгийн нисэх буудал нь хоёр нисэх зурвасынхаа зөвхөн нэгийг нь ашиглаж байгаа аж.
Иймд нисэх буудлын удирдлагаа зорчигчдод хандан нислэгийнхээ талаар урьдчилан лавласны дараагаар нисэх буудал руу ирж байхыг зөвлөжээ. Хойшилсон нислэгүүдийн дийлэнх нь "Cathay Pacific", "Hong Kong Airlines" компанийнх байжээ.
Хонконгт наймдугаар сарын 2-оос эхлэн төрийн албан хаагчид эсэргүүцлийн хөдөлгөөнд нэгдсэн. Наймдугаар сарын 3-нд эсэргүүцлийн жагсаалд оролцогчид Кросс-Харбор тунелийг хааж, гудамжинд хаалт босгосон. Наймдугаар сарын 4-нд жагсагчид эрх баригчдын гаргаж өгсөн замаас гарч цагдаагийн хэсгийг бүслэн тоосго, өндөг шидэлсэн. Наймдугаар сарын 5-нд эсэргүүцлийн жагсаал дахин гарахад нисэх буудлаас гадна төмөр зам, авто замын хөдөлгөөнд ихээхэн саатал үүссэн байна.
Хонконгийн захиргааны тэргүүн Кэрри Лэм бий болсон байдалтай холбогдуулан мэдэгдэл хийж "Тодорхой шаардлагын төлөө үүсгэж байгаа ийм өргөн хүрээтэй ажил хаялт ба хамтран ажиллахыг хүсэхгүй байгаа явдал нь Хонконгийн эмх журмыг ихээхэн алдагдуулж, бид бүхний хайртай, хамтдаа бүтээн байгуулсан хотыг маш аюултай байдал руу түлхэж байна" гэжээ.
Хонконгийн нисэх буудал нь хүлээн авдаг онгоцны тоогоороо Азид дөрөвдүгээрт, дэлхийд аравдугаарт ордог том байгууламж. Түүгээр жилдээ 60 сая гаруй зорчигчид үйлчлүүлдэг.
Сэтгэгдэл (0)
Сэтгэгдэл бичигдээгүй байна