АНУ нь Венесуэлд бий болсон нөхцөл байдлыг зохицуулах бүх л хувилбаруудыг судалж байгаа бөгөөд одоогийн удирдагч Николас Мадурогийн төрийг түлхэн унгахад шаардлагатай бүх л хэрэгслийг ашиглах тухай Цагаан ордны хэвлэлийн төлөөлөгч Стефан Гришэмийн хийсэн мэдэгдэлд дурджээ.
Тус мэдэгдэлд "Бүх хувилбаруудыг судалж байгаа. Венесуэлд Мадурог төрийн эрхээс зууралдахгүй болгох, Венесуэлийн ард түмнийг хүмүүнлэгийн тусламжаар хангах, Венесуэлд ардчилсан шилжилтийг хангахад шаардлагатай бүх л хэрэгслийг АНУ ашиглана" гэсэн байна. Мөн "Венесуэл улс нь тогтвортой, ардчилсан, хөгжингүй ирээдүйг олж авах, нэгэн цагт агуу явсан энэ улсыг сүйрүүлсэн социализмын аймшгаас чөлөөтэй болгохын тулд Мадурогийн дарангуйлал дуусах ёстой" гэсэн байна.
Үүнээс өмнө АНУ-ын эрх зүйн мэдэлд хамаарах бүх л газар байгаа Венесуэлийн Засгийн газрын бүх хөрөнгийг түр хураан авах тухай тушаалд Ерөнхийлөгч Трамп гарын үсэг зурсан юм. Мөн Мадурод тусалж байгаа ямар ч хувь хүн, түүний дотор гадаадын иргэдийн эсрэг хориг арга хэмжээ авахаар болсон байна. Цагаан ордны хэвлэлийн төлөөлөгч нь "Энэхүү тушаал нь Венесуэлийн ардчилсан замаар сонгогдсон Үндэсний ассамблей болон түр Ерөнхийлөгч Хуан Гуайдогийн эсрэг үйл ажиллагаа явуулж байгаа бүгдийг эсрэг чигэлсэн алхам" гэсэн тайлбар өгчээ.
Өөрийгөө Ерөнхийлөгчөөр томилсон Хуан Гуайдог төрийн эргэлт гаргах гэж удаа дараалан оролдоод бүтэлгүйтсэний дараагаар америкчууд Венесуэлийн төрийг өөр аргаар эргүүлэхээр шийдсэн нь энэ бололтой. АНУ-ыг дургүйг нь хүргэсэн улс орныхоо удирдлагад өөрийн хүнээ гаргахын тулд дотоодын сөрөг хүчнийг ашиглан төрийн эргэлт хийх гэдэг, тэр нь бүтэлгүйтвэл эдийн засгийн хориг арга хэмжээгээр сулруулж байгаад эцэст нь цэргийн хүчээр хялбархан унагадаг шалгарсан аргатай гэдгийг шинжээчид онцолжээ.
Сэтгэгдэл (0)
Сэтгэгдэл бичигдээгүй байна