Африкийн Танзанид альбинос буюу хялман хүүхэд төрөхийг гай зовлон авчирдаг муу ер, гэсэн атлаа хялман хүүхдийн гар хөл, нүд, бэлэг эрхтэн зэрэг нь аз авчирдаг гэсэн мухар сүсэг хүчтэй байдаг. Үүнээс болоод альбинос хүүхдүүдийг хороох, эд эрхтнийг нь наймаалах нь газар авсан үзэгдэл байсан. Иймд Танзанийн Засгийн газар мухар сүсгээс үүдэлтэй аллагыг зогсоохын тулд 2008 оноос эхлэн "Нэг наран дор" нэртэй кампанит ажил явуулж эхэлсэн байдаг. Энэхүү аяны хүрээнд хялман хүүхдүүдийг хороох тохиолдол жилд 40 гаруй гардаг байснаа 2018 он гэхэд жилийн 8 болж багассан тухай тус улсын "Rai" сонин мэдээлжээ.
"Нэг наран дор" кампанит ажлыг үүсгэн байгуулагч Питер Эш нь байдал ингэж огцом сайжирсан нь том ололт хэдий ч цаашдаа ч энэ талаар тууштай ажил хэрэгжүүлсээр хийх ёстойг анхааруулсан байна. Учир нь, хялман хүмүүсийг эд эрхтнийг нь дамлах гэж хороохоо байсан ч ажилд авахгүй хавчин гадуурхах үзэгдэл арилаагүй байгааг Питер Эш онцолжээ. Иймд Танзанийн засгийн газар ба хүмүүнлэгийн байгууллагуудад хандан альбинос хүмүүсийг ажлын байраар хангахад илүүтэй анхаарахыг уриалсан байна.
Сэтгэгдэл (0)
Сэтгэгдэл бичигдээгүй байна