Нью-Йорк хотын төв талбай Таймс-скверд цугласан олон зуун хүмүүс мотоциклын яндангийн тэсрэх дууг буудалцааны чимээ гэж андууран үймэлдэн гүйж, нэгнээ гишгэлсэн талаар "New York Post" сонин мэдээлсэн байна.
Өнгөрөгч ням гарагт Америкт гурван ч удаа буудалцаа болж 20 гаруй хүн амиа алдаж, 60 орчим шархдаж байсан. Хэвлэл мэдээллийн хэрэгслүүд, олон нийтийн сүлжээгээр тархсан буудалцааны тухай ярианд цочирдоод байсан хүмүүс хүчтэй мотоциклын хөдөлгүүрийн цуварсан олон тэсрэлтийг чимээг буудалцаантай андууран үймсэн бололтой. Олон хүн эмх замбараагүй гүйлдэх үеэр нэг хүн гишгүүлж гэмтсэн мөн олон эцэг эхчүүд хүүхдүүдээ алдаад, дараа нь олох гэж нэлээд юм болсон тухай мэдээллийн хэрэгслүүд өгүүлсэн байна.
Наймдугаар сарын 3-нд Эл Пасо хотноо 21 настай Патрик Крузиус гэгч худалдааны төв дотор хүмүүс руу буудахад 20 хүн амиа алдсан. Хэдхэн цагийн дараа Дейтон хотод үл мэдэгдэх хүн баарны орчим гал нээж 10 хүний аминд хүрсэн. Үүний дараагаар Чикаго хотод үл мэдэгдэх этгээд тоглоомын талбайн орчим хүмүүс рүү буудаж долоон хүнийг шархдуулсан.
Сэтгэгдэл (0)
Сэтгэгдэл бичигдээгүй байна