Киргизийн тусгай хүчнийхэн тус улсын экс Ерөнхийлөгч Алмазбек Атамбаевыг, Кой-Таш тосгон дахь гэрээс нь баривчлан үл мэдэгдэх зүгт авч явсан тухай "Апрель" ТВ суваг мэдээлжээ. Тус суваг нь баривчлах ажиллагааг "YouTube"-ээр шууд нэвтрүүлсэн байна.
Экс Ерөнхийлөгчийг дэмжигчид тосгонд олноор цугларч, тэдний дээгүүр нисдэг тэрэг нисч байгаа нь шууд нэвтрүүлгээр гарчээ. Баривчлах үеэр буун дуу удаа дараалан гарч, 10 хүн шархадсан байна.
Энэ оны долоодугаар сард Киргизийн парламент нь Атамбаевын халдашгүй эрх ба экс Ерөнхийлөгч гэсэн статусыг нь хүчингүй болгосон. Түүнд гэмт хэргийн бүлэглэлийн гишүүдийг шоронгоос сулласан, авлига, орлогоо нуун далдалсан зэрэг хэрэг тулгаад байгаа юм. Атамбаевыг тушаалаасаа бууснаас хойш 1,5 жилийн дотор түүний олон хамтрагчид эрүүгийн хэрэг үүсгэн шалгах болсон.
Сэтгэгдэл (0)
Сэтгэгдэл бичигдээгүй байна