Сүхбаатар дүүргийн наймдугаар хороонд Төрийн ордны хажууханд борооны усны улмаас цөмрөлт үүссэн. Гэвч энэхүү цөмөрсөн нүхэн доор "хонгил" илэрсэн гэх мэдээллийг тухайн газрын ойролцоог үйлчилгээ эрхлэгчид ярьсан байна. Өнөөдөр өглөөний 09 цагаас эхлээд цөмрөлт үүссэн газрыг Цагдаагийн Ерөнхий газар хамгаалалтандаа авч Онцгой байдлын албан хаагчид хонгилруу орж үзсэн. Мөн дээр нь Тагнуулын Ерөнхий газрын харьяа Төрийн тусгай хамгаалалтын газрынхан, тус газрын дарга П.Батаа ирж цөмөрсөн нүхэн дээр ирж ажилласан, тэнд баахан утсаар ярьж зогсож буй харагдсан.
Төрийн гурван байгууллага таван цаг цөмөрсөн нүхэн дээр бужигнасан атлаа тухайн нүхийг бөглөх ажиллагаа огт явагдаагүй нь анхаарал татаж байна. Дээр нь Төрийн ордны хамгаалалтын бүсэд хамаарахгүй байтал Төрийн тусгай хамгаалалтын газрын дарга нь өөрийн биеэр ирж ажилласан нь л мөн анхаарал татаж байгаа юм. Энэ талаар хэн ч мэдээлэл өгсөнгүй, энд ажиллаж байгаа төрийн гурван байгууллагын хэвлэл мэдээллийн албад таг чиг. Гэнэт үүссэн нүхийг ямартаа ч олон нийтээс нууцлах сонирхол албаныханд байна. Ямар учраас ийнхүү нууцлаад байгаа ч хэвлэлийнхэн анхаарлыг татахуйц. Цөмөрсөн нүх болгон дээр Цагдаа, Тагнуул, Онцгой, Төрийн тусгайгийнхан очиж ажилладаггүй учир хэвлэлийнхэний анхаарлыг татаад байна. Энэ асуудалд удахгүй холбогдох албаныхан мэдээлэл өгөх биз ээ.
Сэтгэгдэл (0)
Сэтгэгдэл бичигдээгүй байна