Овооны наадамд унасан морь нь түрүүлээгүй арван настай М хүүг морины эзэн зодсон талаар бид мэдээлсэн. Хүүгийн ар гэрийнхэн цагдаагийн байгууллагад хандаж чадаагүй боловч цагдаагийн байгууллага хэргийг шалгаж, хохирогч хүүгийн ар гэрийнхэнтэй холбогдож, тайлбар мэдүүлэг авчээ.
Ингээд хүүг "Хүүхдийн тусламжийн 108" төвийнхөнд хүлээлгэн өгсөн бөгөөд хүүг түр хамгаалах байранд байрлуулахаар авч явсан байна. Энэ талаар хүүгийн ээж Г-ээс тодруулахад "Хүүг маань сая аваад явсан. Эмнэлгийн шинжилгээ хийж, хуульчид туслалцаа үзүүлнэ гэсэн. Миний хүүг М гэдэг 35 орчим насны залуу өнгөрсөн зургаадугаар сард морь унуулахаар гуйж аваад явсан. Гэртээ байлгаад морио унуулдаг байсан. Хүүд маань болон бидэнд ямар нэгэн мөнгө төгрөг өгч байгаагүй. Харин хүүд маань хувцас авч өгдөг байсан. Хүү маань овооны наадам болохоос өмнө найзуудтайгаа гурав хоног хот руу явчихсан юм байна лээ. Тэгээд хэл сураггүй явлаа гэж, бас унасан морио түрүүлгэсэнгүй гэж зодсон гэсэн. М-ын найзууд наад хүүхдээ зодоод хашраачих, тэгвэл дахиад хэл сураггүй явахгүй гэсний дагуу хүүг маань зодсон байна. Хүүгийн маань гар тохой орчмоороо хугарсан. Бас нуруу, гуя нь хөхөрч шархалсан байна лээ. Бид нар томографф шинжилгээ хийлгэж чадаагүй. Өнөөдөр хүүг маань авч явсан хүмүүс бүх шинжилгээг хийлгэнэ гэж хэлсэн" гэлээ.
Уяачдаа зодуулаад, зугатаж гарсан хүү гэрийнхэнтэйгээ уулзаж, УБ луу явахаар зам дагуу зогсож байхад нь нэгэн сайхан сэтгэлт иргэн тусласнаар тэд эмнэлгийн тусламж авснаас гадна хүүхдийн хүчирхийллийн энэ хэрэг олон нийтэд ил болсон юм.
Сэтгэгдэл (0)
Сэтгэгдэл бичигдээгүй байна