Энэ сарын 8-ны өдөр Төв аймгийн Баянчандмань суманд болсон овооны наадамд "морийг нь түрүүлгээгүй" хэмээн 10 настай унаач хүү М-ыг зодсон уяач М-ын талаар бид наймдугаар сарын 9-нд мэдээлсэн.
Манай сайтад мэдээлэл нийтлэгдсэний дараа Гэр бүл, хүүхэд залуучуудын хөгжлийн газрын Хуулийн хэлтсийн дарга А.Энхбаатар "Бусдад зодуулсан тийм унаач хүү олдохгүй байна. ГССҮТ-өөс ч мэдээллийг шалгасан" гэсэн. Харин тэр өдрийн 14.00 цагаас цагдаагийн байгууллага хэргийг шалгаж эхэлсэн бөгөөд Төв аймгийн Баянчандмань сумын цагдаагийн газрын хоёр ажилтан хэргийг шалгаж, гэрчүүдээс мэдээлэл цуглуулж, 10-ны өдөр уяач М-ыг өөр нэгэн наадамд очсон байхад нь баривчилжээ. Түүний хэргийг Төв аймгаас Улаанбаатар хот руу шилжүүлэн шалгаж эхэлсэн байна. М-ыг одоогоор батлан даалтад гаргаад байгаа аж.
Харин 10 настай унаач хүүг Хүүхдийн тусламжийн 108 төвийн Түр хамгаалах байранд байршуулан эмнэлгийн болон хуулийн тусламж үзүүлж байна. Хүүгийн нэр гарыг гипсдсэн, нуруу, гуянд ил харагдах шарх, хөхөрсөн сорви ихтэй байгаа аж. Хүүд шүүх эмнэлгээс үзлэг шинжилгээ хийсэн байна.
Насанд хүрээгүй хүүхдийг хүчирхийлсэн, хөдөлмөрийн мөлжлөгт автуулсан байж болох энэ хэргийн талаар бид үргэлжлүүлэн мэдээлсээр байр болно.
Сэтгэгдэл (0)
Сэтгэгдэл бичигдээгүй байна