Өнгөрсөн тавдугаар сарын 30-31-нд шилжих шөнө Өргөө амаржих газарт амаржихаар очсон эх амь насаа алдсан талаар бид өмнө цувралаар сурвалжлан үзэгчиддээ хүргэж байсан. Талийгаач 4, 7, 12 настай гурван хүүхдийн ээж байсан бөгөөд дөрөв дэх төрөлт дээрээ ийнхүү амь эрсэдсэн юм.
Өнгөрсөн гурван сарын хугацаанд талийгаачийн ар гэрийнхэн ЭМ-ийн сайд Д.Сарангэрэлд хандан хоёр удаа өргөдөл өгсөн бөгөөд өргөдлийн хариуг 50 хоногийн дараа өгчээ. Ингэхдээ "Хариуцлага алдсан Өргөө амаржих газрын дарга Г.Баясгаланг ажлаас нь чөлөөлсөн. Бусад асуудлыг хуулийн байгууллагаар шийдүүлнэ үү" гэсэн утга бүхий албан бичиг өгсөн байна.
Мөн өнгөрсөн хугацаанд цогцост хийсэн шүүх шинжилгээний дүн гарчээ. Дүгнэлтэд "Ургийн жин 3250 гр, өндөр 52 см, эрэгтэй хүүхэд. Эхийн зүүн талын 1-4-р хавирга хугаралтай. Энэ хугарал нь амьд байхад нь үүссэн. Кесаров хагалгааг эрт хийх байжээ. Эх уушги, зүрхний шокийн улмаас амь насаа алдсан байна" гэсэн дүгнэлтийг гаргажээ.
Харин ЭМ-ийн саыд талийгаачийн ар гэрийнхнийг хүлээж авдаггүй, тусламж үзүүлдэггүй, асуудлыг хуулийн байгууллага руу тохож орхисон учир талийгаачийн ар гэрийнхэн Ерөнхий сайд У.Хүрэлсүхэд хандаж байна. Тодруулбал, МУ-ын Ерөнхий сайдын хувьд, эцэг хүнийхээ хувьд, Хүүхдийн төлөө үндэсний зөвлөлийн тэргүүний хувьд талийгаачийн өнчирч үлдсэн 3 хүүхдэд тусламж үзүүлж, хариуцлага алдсан эмнэлэг, салбарын сайдад зохих хариуцлагыг үүрүүлж өгнө үү хэмээн өргөдлөө бичиж төрийн ордны зүүн хаалган дээр ирсэн байна.
Бид үзэгчиддээ бүрэн мэдээлэл хүргэх үүднээс өмнөх сурвалжлагуудын бичлэгийг мөн хүргэж байна.
Ц.Анхзул
Сэтгэгдэл (0)
Сэтгэгдэл бичигдээгүй байна