МАШИНЫ СИГНАЛАА ДАРАЛГҮЙ 18 ЖИЛ БОЛЖЭЭ

18 жил сигнал дараагүй Энэтхэгийн жолооч Дипак Дас "Мануш Санман" шагналын эзэн болжээ. Хачирхалтай санагдаж магадгүй ч дэлхийд автозамын ослоороо тэргүүлдэг Энэтхэг улсад жолооч нар нь байнга сигнал дарж, иргэдийг бухимдуулдаг тул ийм шагнал олгодог байна. Энд хоёр машин зөрөх юмуу, хоорондоо жаахан ойртох төдийд л сигнал дардаг гэхэд хилсдэхгүй. Жолооч нарын тэвчээргүй байдлаас болж дуу чимээний бохирдол ихсэж, нийгэм стрессдэж эхэлжээ.

Тиймээс Энэтхэгийн хүмүүнлэгийн үйлстэн Мануш Санман өөрийн нэрэмжит шагналыг бий болгож, дуу чимээний бохирдлыг бууруулахын төлөө тэмцэж байна. Энэ жилийн шагналын эзнээр жолооч Дипак Дасыг тодруулсан нь учиртай. Тэрээр нэр хүндтэй урлаг, соёлын оддын жолоочоор ажиллаж байсан бөгөөд замын хөдөлгөөнд соёлтой, ёс зүйтэй оролцдог гэдгийг олон хүн гэрчилжээ.

Гэнэт огцом, чанга дуу чимээ, шуугиан хүний эрүүл мэндэд асар их хохирол учруулаад зогсохгүй бүх өвчний үндэс суурийг тавьж өгдөг гэнэ. Гэнэтийн дуу чимээ даралтыг огцом ихэсгэж, зүрхний цохилт нэмэгдүүлдэг гэдгийг хүмүүс мэддэггүй учраас тухайн үедээ уурлаад өнгөрдөг байна. Орчин үед автомашины жолооч нар дуут дохиогоор биш гэрлийн дохиогоор харьцаж, ярилцахыг эрхэмлэх болжээ.