Германы Дортмунд хот дахь лалын сүм рүү үл мэдэгдэх хоёр этгээд шатаагч шингэнтэй лонх шидсэн хэрэг гарсан тухай хотын цагдаагийн албанаас мэдээлсэн байна. Аравдугаар сарын 21-ний үүрээр хоёр этгээд лалын сүм рүү шатах шингэнтэй лонх шидэхэд нэг нь сүмийн нүүрэн хэсгийн хананд тусан хагарч шатсан бол нөгөөх нь сүм хүрэлгүй өмнөх зам дээр унаж шатсан байна. Дуудлагаар цагдаа нар ирэх үед сүмийнхэн түймрийг унтраасан байжээ. Сүмийн нүүрэн хэсэг ялихгүй шатсанаас өөр ямар нэг хохирол учраагүй, хүн гэмтэж бэртээгүй байна.
Хотын цагдаагийн газрын дарга энэ хэргийг онцгой хяналтад авсан, мөрдөн байцаахаар тусгай баг бүрдүүлсэн тухайгаа мэдэгдсэн байна. Цаашил лалын сүмүүдийн аюулгүй байдлын системд илүү өндөр шаардлага тавигдаж магадгүй. Үүнээс өмнө Германы Галле хотын еврей сүм рүү хэт даврагч үзэлтэн дайрч буудсаны улмаас хоёр хүн амиа алдаж, есөн хүн шархадсан хэрэг гарч байсан юм.
Хойд Африк, Ойрх Дорнодыг хамарсан олон дайны тулааны улмаас сая гаруй цагаачид, дүрвэгчид Германд орж ирсэн гэсэн мэдээ байдаг. Тэдний дунд Германы хэл, соёлыг мэддэггүй, мэдэхийг ч хүсдэггүй цөөнгүй хүн янз бүрийн гэмт хэрэгт холбогдох нь эрс нэмэгдсэн нь нутгийн иргэдийн дургүйцлийг хүргэж, улмаар неонацист, хэт үндсэрхэг үзэл газар авах болсны илрэл нь энэ мэт гэмт хэрэг юм.
Сэтгэгдэл (0)
Сэтгэгдэл бичигдээгүй байна