Манай сайтын мэдээллийн голлох эх сурвалж нь иргэд байдаг. Өөрөөр хэлбэл, иргэдэд тулгамдаж байгаа асуудлууд, тэдний эдлэх ёстой хуулийн эрх зөрчигдсөн асуудлуудыг манай редакцид мэдээлснээр бид асуудлыг судлан, мэдээлэл сурвалжилга бэлтгэдэг.
Иргэн О манай редакцид хандан, Налайх дүүргийн 6-р хороонд байрлах “Ресорт ворлд тэрэлж хотел” гэх амралтын газрын ажилчид ажлын байран дээрээ хар тамхи хэрэглэж байгаа нь тухайн амралтын газрын хяналтын камерт үлдсэнийг баримтаар авчран өгсөн юм. Тодруулбал, өнгөрсөн 2019 оны 11-р сарын 27-ний өдөр тухайн амрталтын газрын ажилчид болох Б, Г нар уурын зуухандаа хар тамхи хэрэглэж байгаа нь бичлэгт үлджээ.
Тухайн асуудлыг амралтын газрын удирдлагууд, тодруулбал, менежер Т мэдэж, нийт ажилчдын хурал зарлаж, асуудлыг тодруулаад, хар тамхи хэрэглэхдээ ашигласан ундааны хуванцар сав зэргийг хураан авсан байна. Ингээд “Байгууллагын нэр төртэй холбоотой асуудал учир цагдаагийн байгууллагад мэдэгдэхгүйгээр хав дарах нь зүйтэй” хэмээн ажилчиддаа үүрэг болгосон гэлээ. Ингээд хар тамхи хэрэглэсэн хоёр ажилтнаа “Согтууруулах ундаа хэрэглэсэн” шалтгаанаар ажлаас нь халсан гэсэн мэдээллийг бидэнд өгсөн юм.
Харин тухайн үед хамгаалалтын албанд ажиллаж байсан иргэн О тэдний хэрэглэж байгаад үлдээсэн хар тамхины үлдэгдэл хэсгийг тухайн амралтын газрын хашаанд байх нэгэн хус модны ур хэсгийн нүхэнд нуусан байна. Тэрбээр, “асуудал үүсч шалгагдвал баримт үлдэх ёстой” гэж үзсэн учраас тухайн нүхэнд хийсэн гэв.
Манай редакцид ирсэн тухайн амралтын газрын 2019.11.27-ний өдрийн камерын бичлэгнээс гадна, тухайн модны ур хэсгийн нүхэнд нуусан хар тамхийг ил болгож, холбогдох хууль хяналтын байгууллагад баримт гарган өгөх шаардлагатай гэж бид үзсэн учир мэдээллийг ЦЕГ-ийн Хэвлэл мэдээллийн төвөөр дамжуулан өгсөн.
Ингэснээр манай сурвалжлах багтай хамт ЦЕГ-ын Хар тамхитай тэмцэх хэлтсийн алба хаагчид тухайн амрталтын газарт очсон юм. /2020.01.22/
Иргэний өгсөн мэдээллийн дагуу тухайн хус модны ур хэсгийн нүхийг шалгахад тугалган цаасанд боосон зүйл байгааг Хар тамхитай тэмцэх хэлтсийн алба хаагчид тодорхой болгов. Ингэхдээ тус амралтын газрын төлөөлөл болон хөндлөнгийн гэрчүүдийг байлцуулан тухайн хэсэгт хэргийн газрын үзлэг, хэмжилт хийгээд, уг боодолтой зүйлийг гарган авсан.
Ингээд боодолтой зүйлийг тусгай жингээр жинлэж үзэхэд 3.5 грамм жинтэй, бор хүрэн энгийн хуурай зүйл нэг цул бүхэллэг болон хөлдсөн байсныг баримтаар хураан авч, шинжилгээнд явуулахаа хэлсэн. Цагдаагийн байгууллагын шинжилгээний дүн ирэх долоо хоногт албажин гарах юм.
Тухайн нунтаг нь хар тамхины ургамал бөгөөд өөр нэгэн зүйлтэй хольж боловсруулсан зүйл гэдгийг эх сурвалж мэдээлсэн.
Цагдаагийн алба хаагчдын бидэнд өгсөн мэдээллээр “уг асуудалд холбогдуулан мэдээлэгч иргэн болоод тухайн амралтын газрын ажилчид, тухайн үед хэрэглэж байгаад ажлаасаа халагдсан иргэд зэргээс холбогдох мэдээллийг авч, шалгана” гэсэн тайлбарыг өглөө.
Нэмж мэдээлэхэд, тухайн үед уг бодисыг хэрэглэж байгаад ажлаасаа халагдсан иргэн Г, Б нар нь Налайх дүүргийн иргэд бөгөөд өмнө нь хар тамхины хэргээр цагдаагийн байгрууллагад баригдаж, шалгагдаж, шүүхээс тэнсэн харгалзах ялтай байсан гэх мэдээлэл байгаа юм.
Нэгэнт цагдаагийн байгууллага баримтыг хураан авч, асуудлыг шалгаж эхэлсэн тул бид Цагаан тахал гэгдэх хар тамхитай холбоотой энэ асуудлаар лавшруулан мэдээллийг хүргэх болно.
Сэтгэгдэл (0)
Сэтгэгдэл бичигдээгүй байна