Дархан хот 60 жилийн ойгоо тэмдэглэхээр 500 сая төгрөг төсөвлөсөн. Цар тахлын энэ цаг үед энэхүү мөнгөө боловсрол, эрүүл мэндийн салбартаа зарцуулж Дарханчууддаа бэлэг бариж байна. Өглөөний 08:00 цагт ерөнхий боловсролын сургуулийн сурагчид ангидаа эхний цагтаа суухаар цугларч байна. Найрамдлын тодотголтой Дархан хотынхоо үүх түүхийг харуулсан танилцуулгыг сурагчид үзэж, хотынхоо даргатай ирээдүйн зорилго, хүсэл мөрөөдөл, тулгамдсан асуудлаа хамтдаа ярилцсан юм. Мөн ерөнхий боловсролын 27 сургуулийн 7-12 ангийн 9700 гаруй сурагчидад МЭНДЧИЛГЭЭ бүхий захидал илгээж тэдний саналыг бичгээр авсан юм.
Эцэг эхийн хайрыг мэдэлгүй өсч яваа 80 орчим хүүхэд Дархан хотод бий. Эдгээр хүүхдүүдийн төлөөлөлтэй уулзахад дугуйлан, секцээр хичээллэхэд шаардлагатай төлбөр, тэмцээн уралдаанд оролцоход зардлын асуудал хамгийн их тулгамддагыг хэлж байлаа. Жилийн хугацаанд дуртай секц дугуйландаа үнэ төлбөргүйгээр суралцах, тэмцээн, уралдаанд оролцохдоо тодорхой хэмжээний замын зардлаа аймгийн Засаг даргаараа шийдүүлж байх эрхийг эдгээр хүүхдүүдэд өгсөн юм. Мөн хорт хавдартай, эрүүл мэндийн шалтгаантай 11 хүүхэд тус бүр эмчилгээнийнх нь зардалд зориулан нэг сая төгрөгийн дэмжлэгийг хотынхоо ойг тохиолдуулан эцэг эхчүүдэд нь бэлэглэлээ. Энэ бүгд ойгоо тэмдэглэхээр төсөвлөсөн мөнгөнөөс зарцуулагдаж байгаа юм.
Дарханчууд хотынхоо 60 жилийн ойг баярын салютгүй, хүлээн авалт, найр наадамгүйгээр хүүхэд багачуудаа сонссон, тэдний өмнө тулгамдсан асуудлыг шийдсэн, эрүүл мэндийн салбартаа хөрөнгө оруулсан, бусдад тусалсан, сэтгэлийн дэм хайрласан хэлбэрээр тэмдэглэн өнгөрүүлж байна.
Сэтгэгдэл (0)
Сэтгэгдэл бичигдээгүй байна