Аймгуудын өрсөлдөх чадварын судалгаа -2023" тайланг танилцууллаа

Эдийн засгийн бодлого, өрсөлдөх чадварын судалгааны төв “Аймгуудын өрсөлдөх чадварын судалгаа -2023" тайланг танилцууллаа. Уг судалгаагаар 21 аймгийн өрсөлдөх чадвар, хөгжлийн түвшнийг 181 үзүүлэлтийн дагуу цогц байдлаар судалж, хооронд нь харьцуулсан байдлаар дүгнэдэг.  Судалгааны аргачлалын хувьд статистик үзүүлэлтүүд болон санал асуулга ашигладаг байна.

Энэ удаагийн судалгааны үр дүнгээр Орхон аймаг өрсөлдөх чадвараараа тэргүүлж, Дорноговь аймаг удаалжээ. Дархан-Уул, Өмнөговь, Говьсүмбэр аймаг өмнөх жилүүдээс эрэмбийн өөрчлөлтгүй буюу 3, 4, 5 дугаарт эрэмбэлэгдсэн байна. 

Харин Дундговь, Завхан, Говь-Алтай зэрэг аймаг хамгийн хойгуур эрэмбэлэгдсэн ба бизнесийн үр ашиг нь бусад аймгуудтай харьцуулахад харьцангуй сул байжээ. 

Өрсөлдөх чадварын ерөнхий үнэлгээгээр тэргүүлсэн аймгуудыг өрсөлдөх чадвар хамгийн сайтай, хойгуур эрэмбэлэгдсэн аймгуудыг муу гэхээсээ илүүтэй бусад аймгуудтай харьцуулбал харьцангуй сул байна гэж ойлговол зүйтэй гэдгийг судлаачид онцлов. 

Учир нь уг өрсөлдөх чадварын оноог тухайн жилд нэгдүгээрт эрэмбэлэгдсэн аймгийг 100 оноотой гэж үзэж бусад аймгууд тухайн 100 оноотой харьцуулбал хэдэн оноотой байх вэ гэдгээр харьцуулан гаргадаг аж. 

2023 онд нийт аймгуудын өрсөлдөх чадварын дундаж оноо 66.6 болж өмнөх оныхоос 1.6 оноогоор өссөн байна.

Энэ талаар Эдийн засгийн бодлого, өрсөлдөх чадварын судалгааны төвийн ерөнхий захирал Б.Лакшми "12 жилийн хугацаанд аймгуудын өрсөлдөх чадварын судалгааг хийхэд ерөнхийдөө таван аймаг ээлж дараалан доогуур байр эзэлж байна.

Сүүлийн жилүүдэд ахиц дэвшил гарсан аймгуудыг дурдвал Булган, Өмнөговь зэрэг аймаг байна. Аймгуудын өрсөлдөх чадварт бүсчилсэн хөгжил том хэмжээний нөлөө үзүүлэхгүй гэж харж байна. Нийт аймгийн хувьд эдийн засгаа сэргээхэд төслөөс үл хамааран хийх боломжтой зүйл нь хувийн хэвшлүүдийг дэмжих юм" гэлээ.

Аймгуудын өрсөлдөх чадварын оноо

1. Орхон-100
2. Дорноговь-97.96
3. Дархан-Уул-95.12
4. Өмнөговь-81.88
5. Говьсүмбэр-81.73
6. Дорнод 79.36
7. Сэлэнгэ 78.62
8. Хэнтий 78.24
9. Өвөрхангай 77.25
10. Увс 66.67
11. Сүхбаатар 64.10
12. Төв 63.78
13. Баян-Өлгий 63.50
14. Ховд 62.15
15. Хөвсгөл 57.33
16. Баянхонгор 55.52
17. Архангай 48.89
18. Булган 40.08
19. Говь-Алтай 36.72
20. Завхан 35.69
21. Дундговь 34.93