Нөөцийн махыг нийслэлийн хэмжээнд 446 дэлгүүрт борлуулж байна

Өнөөдрийн байдлаар 75.3 тонн үхрийн мах, 68.6 тонн хонины мах буюу нийт 143.9 тонн мах борлуулаад  байна. Мөн нөөцийн махны өргөтгөсөн худалдааг хоёрдугаар сарын 24-27-нд есөн дүүргийн 18 байршилд зохион байгуулж өргөтгөсөн худалдаагаар нийт 99.57 тонн хонины мах худалдан борлуулаад байгаа аж. Нөөцийн махыг нийслэлийн хэмжээнд 446 дэлгүүрт жижиглэнгээр борлуулж буй юм.

Энэ талаар УБЗАА-ны Худалдаа, үйлчилгээний асуудал хариуцсан мэргэжилтэн Н.Бумцэнд  “Өнгөрсөн онд нөөцийн махны худалдааг гуравдугаар сарын 1-15-нд эхлүүлдэг байсан. Харин энэ онд махны нийлүүлэлт багасаж, зах зээлийн үнэ өндөр байгаатай холбоотой нөөцийн махны худалдааг хоёрдугаар сарын 7-ноос эхлүүлсэн. Ингэхдээ нийт 10 аж ахуйн нэгжийн 8713 тонн махыг нөөцөлсөн. Жижиглэн худалдаа эхэлснээс хойш 40 хоногийн хугацаанд 143.9 тонн махыг худалдан борлуулаад байна” гэв.