Венесуэлийн Ерөнхийлөгч Николас Мадурогийн Засгийн газар сөрөг хүчний талд орж, өөрсдийнх нь эсрэг хүчтэй суртал ухуулга явуулсан гэж шалтаглан сэтгүүлчдийг намнаж эхэлсэн байна. Олон улсын хэвлэлүүдийн мэдээлснээр өнгөрсөн долоо хоногт Европын холбоо, Испани улсын зүгээс Н.Мадурогийн эсрэг хүчтэй байр суурь илэрхийлсний дараа арваад сэтгүүлчийг барьж хорьсон гэнэ. Хэдийгээр тэднийг удаалгүй сулласан боловч бүгдийг нь Венесуэль улсаас хөөн гаргасан аж.
Тухайлбал, Испанийн ИФИ мэдээллийн агентлагт сурвалжлага бэлтгэж явсан хоёр сэтгүүлчийг өнгөрсөн лхагва гарагт зочид буудлынхаа өрөөнд байхад галт зэвсэгтэй дотоодыг хамгаалах албаныхан дайран орж баривчилжээ. Испани сэтгүүлч Гонзало Домингез, Колумб продюсер Маурен Баррига Варгас нарыг Хелокойдэд байдаг, гол төлөв улс төрийн хэрэгтнүүдийг хорьдог, тус улсын хамгийн чанга хатуу дэглэмтэй шоронд хорьжээ. Гадны хэвлэлийнхнээс гадна орон нутгийн иргэд, сэтгүүлчдийг ч гэсэн хоморголон баривчилсан тухай ч мэдээлэл бий.
Сэтгэгдэл (0)
Сэтгэгдэл бичигдээгүй байна