ХОВОР БАРЫН БОЛЗОО ҮХЛЭЭР ДУУСЧЭЭ

Лондоны амьтны хүрээлэнгийн ажилтнууд мөхлийн ирмэгт тулсан маш ховор төрлийн эрэгчин барыг эмэгчинтэй нь уулзуулж, улмаар хурьцалд оруулж, Суматрын барын төрлийг аврах зорилготой болзоо зохион байгуулсан боловч тун харамсалтай байдлаар төгсчээ. Асим хэмээх долоон настай Суматрын барыг өнгөрсөн баасан гарагт арван настай Мелати хэмээх эмэгчинтэй нь уулзуулсан байна. Гэтэл ижил төрөлтэйгөө анх удаа учирсан эрэгчин бар гэнэт түрэмгий аашилж, Мелатигийн аминд хүрсэн харамсалтай хэрэг гарчээ. Амьтны хүрээлэнгийн зүгээс мөхлийн ирмэгт тулсан барын төрлийг аврах оролдлого нь Мелатигийн үхлээр дуусч хүн төрөлхтөний хувьд маш том гарз хохирол учирлаа гэж мэдэгдэлдээ харамсал илэрхийлжээ. Европийн ховор төрлийн амьтдыг авран хамгаалах хөтөлбөрийн дагуу Асимыг арав хоногийн өмнө Дани улсаас Лондонд авч ирсэн юм байна. Бар сургагч Кэтрин Сандэрс "Асим бол маш царайлаг, өхөөрдөм бар. Амьтны хүрээлэнд байхдаа үзэгчдийн сэтгэлийг татсан найрсаг бар байлаа. Харамсалтай нь Лондонд ижил төрөлтэйгөө уулзаад огцом түрэмгий аашилсныг одоо ч бид гайхаад барахгүй байна" хэмээжээ. Асим, Мелати хоёрыг анх уулзуулахад бие биенээ үнэрлэж, хөөцөлдөж маш дотно байсан ч гэнэт ааш нь хувирч эмэгчин рүүгээ халдах үед амьтны хүрээлэнгийн ажилтнууд дохионы буу, харанга зэргийг ашиглан чанга дуу гаргаж сатааруулахыг завдсан боловч санаснаар нь болсонгүй. Суматрын бар нь дэлхий дээр хамгийн цөөн тоогоор үлдсэн барын нэг төрөл бөгөөд Дэлхийн зэрлэг байгалийн сангийн судалгаагаар ердөө 400 орчим толгой үлдээд байгаа юм байна.