БАЯЧУУДЫН ТАТВАРЫГ 60-70 ХУВЬ БОЛГОНО ГЭВ

Конгрессийн доод танхимын төлөөлөгч Александриа Окасио Кортез "Ногоон шинэ тохиролцоо" хэмээх эдийн засаг, байгаль орчныг хамгаалах төслийг хэрэгжүүлэхийн тулд баячуудын татварыг нэмэхэд бэлэн байгаагаа СиБиЭс сувгийн 60 минут нэвтрүүлэгт ярилцлага өгөхдөө илэрхийллээ. Ардчилсан социалист үзэл баримтлалтай тэрээр байгаль орчин, цаг уурын өөрчлөлтийн эсрэг тэмцэхийн тулд санаачилсан дээрхи хөтөлбөрийг хэрэгжүүлэхэд Засгийн газарт асар их хэмжээний хөрөнгө мөнгө шаардлагатай. Энэхүү санхүүгийн эх үүсвэрийг бүрдүүлэхэд хүн бүр татвараа шударгаар төлж, хүчин зүтгэл гаргах учиртай. Тэр тусмаа баячуудын хувьд илүү өндөр татвар төлж, нийгмийн өмнө хүлээсэн хариуцлагаа биелүүлэх ёстой гэдгийг алдарт хөтлөгч Андерсон Купертай хийсэн ярилцлагадаа чухалчилжээ. "Баячуудыг татвардъя!" гэх уриа дэвшүүлээд байгаа тэрээр баячуудад оногдуулах татварын хэмжээ 60-70 хувьтай байхад хангалттай гэж тооцсон байна. Мөн түүний ярьж байгаагаар "Ногоон шинэ тохиролцоо"-г хэрэгжүүлэхэд Засгийн газрын шууд оролцоо жанжин шугам нь болно. Энэхүү хөтөлбөр нь социализмд хүргэх Тройн модон морь мэт байна гэдгийг ч онцлон хэлэв. Татварын хэмжээг нэмэгдүүлж, дээд тал нь 82.6 хувьд хүргэх бололцоотой. Үүний тулд Америкийн татварын системийн шинэчлэлтийг яаралтай хийж, ерөнхий чиглэл гаргаж өгөх нь чухал аж.